Toshkent, O‘zbekiston (UzDaily.uz) — O‘zbekiston va Koreya Respublikasi mehnat muhojirlari uchun viza rasmiylashtirish tartiblarini soddalashtirish masalasini muhokama qilmoqda.

17 aprel kuni O‘zbekiston Tashqi ishlar vazirining o‘rinbosari Olimjon Abdullayev Koreya Respublikasining elchisi Von Do Yon bilan uchrashuv o‘tkazdi. Uchrashuvda mehnat migratsiyasi sohasidagi ikki tomonlama hamkorlikni rivojlantirish masalalari muhokama qilindi.

Tomonlar Janubiy Koreya mehnat bozori uchun malakali mutaxassislar tayyorlash, qo‘shma taʼlim dasturlarini rivojlantirish va O‘zbekiston fuqarolari uchun safar oldi tayyorgarligi bo‘yicha yangi tashabbuslarni joriy etish masalalarini atroflicha ko‘rib chiqdilar.

Alohida eʼtibor mehnat muhojirlari, jumladan, mavsumiy ishchilar uchun vizalarni rasmiylashtirishni yengillashtirish, ular uchun qulay shart-sharoitlar yaratish masalalariga qaratildi.

Uchrashuv yakunida O‘zbekiston fuqarolarining Janubiy Koreyada bo‘lib turishlari va mehnat faoliyatini amalga oshirish shartlarini yaxshilashga qaratilgan qo‘shma ishlar davom ettirilishi bo‘yicha kelishuvga erishildi.