O‘zbekiston va FAO “Qishloq xo‘jaligida birinchi milliy ro‘yxatga olishni o‘tkazishda texnik ko‘mak” loyihasini ishga tushirdi

Toshkent, O‘zbekiston (UzDaily.uz) — BMTning Oziq-ovqat va qishloq xo‘jaligi tashkiloti (FAO), O‘zbekiston Respublikasi Statistika agentligi (UzStat) va Qishloq xo‘jaligi vazirligi hamkorlikda “Qishloq xo‘jaligida birinchi milliy ro‘yxatga olishni o‘tkazishda texnik ko‘mak” loyihasini rasman ishga tushirdi.

Mazkur tashabbus O‘zbekiston uchun tarixiy ahamiyatga ega, chunki mamlakat o‘z tarixida ilk bor Milliy qishloq xo‘jaligi ro‘yxatini o‘tkazishga tayyorgarlik ko‘rmoqda. Ro‘yxat birinchi marta o‘tkaziladi va Aholi ro‘yxati bilan bir vaqtda amalga oshiriladi.

Toshkentda o‘tkazilgan kirish seminari UzStat, Qishloq xo‘jaligi vazirligi, Iqtisodiyot va moliya vazirligi, Kadastr agentligi, Suv xo‘jaligi vazirligi, Raqamli texnologiyalar vazirligi, shuningdek FAO, UNFPA, UNDP, UNICEF, Yevropa Ittifoqi Delegatsiyasi, Jahon banki va Osiyo taraqqiyot banki vakillarini bir joyga jamladi.

Ishtirokchilar birinchi qishloq xo‘jaligi ro‘yxatini o‘tkazish mamlakat uchun ishonchli, xalqaro taqqoslanadigan ma’lumotlar bazasini yaratishda muhim ahamiyat kasb etishini ta’kidladilar.

“Bu O‘zbekiston uchun muhim bosqich bo‘lib, mamlakat o‘zining birinchi Milliy qishloq xo‘jaligi ro‘yxatini o‘tkazishga tayyorlanmoqda,” dedi FAOning O‘zbekistondagi vakili o‘rinbosari Sherzod Umarov.
“FAO ro‘yxatning xalqaro standartlarga to‘liq mos kelishini ta’minlash va agrar siyosat uchun zarur bo‘lgan sifatli ma’lumotlar shakllanishiga ko‘mak berishda davom etadi.”

“Aholi va qishloq xo‘jaligini ro‘yxatga olish – mamlakat taraqqiyoti uchun juda muhim tadbir. U orqali aholining soni, yosh tarkibi, turmush sharoiti hamda qishloq xo‘jaligidagi yer maydonlari va chorvachilik haqida aniq ma’lumot olinadi.
Bu esa resurslardan samarali foydalanish va har bir hudud rivojini rejalashtirishda mustahkam asos bo‘lib xizmat qiladi,” dedi Statistika agentligi direktori Behzod Hamraev.

Seminar davomida loyiha maqsadlari, tuzilmasi va amalga oshirish mexanizmlari taqdim etildi. Loyiha zamonaviy metodologiyalar, raqamli data yig‘ish vositalari (CAPI/CAWI), sifat nazorati sxemalari va ma’lumotlarni qayta ishlash, tahrirlash hamda tarqatish tizimlarini mustahkamlashni ko‘zda tutadi.

Ishtirokchilar Qishloq xo‘jaligi ro‘yxati bo‘yicha 2020-yilgi Jahon dasturi (WCA 2020) standartlarini ko‘rib chiqib, O‘zbekistonning birlashtirilgan ro‘yxat modeli uchun zarur metodologik moslashuvlarni belgiladilar.

FAO ekspertlari — Rasmiyya Aliyeva, Giorgi Kvinikadze va Entoni Burgard — metodologiya, raqamli tizimlar, monitoring va ma’lumot boshqaruvi bo‘yicha tavsiyalar berdi. Milliy hamkorlar tayyorgarlikdagi so‘nggi yangiliklar bilan o‘rtoqlashdi.

Seminar loyiha ish rejasi kelishib olinishi va O‘zbekistonning birinchi Milliy qishloq xo‘jaligi ro‘yxatini yuqori sifatli, ishonchli va xalqaro darajada taqqoslanadigan ma’lumotlar bilan ta’minlashga qaratilgan umumiy majburiyat bilan yakunlandi.

FAO mazkur loyiha doirasida ro‘yxatga olish jarayonining barcha bosqichlarida hukumatni qo‘llab-quvvatlashga tayyor ekanini tasdiqladi.