O‘zbekiston va Armaniston Markaziy depozitariylari o‘rtasida hamkorlik bitimi imzolandi

Toshkent, O‘zbekiston (UzDaily.uz) — 2026-yil 30-mart kuni Armaniston Markaziy depozitariysiga O‘zbekiston Markaziy depozitariysida chet ellik nominal saqlovchi hisobvarag‘ini ochish to‘g‘risida hamkorlik bitimi imzolandi. Hujjat ikki davlat qimmatli qog‘ozlar bozoridagi infratuzilmaviy aloqalarni kengaytirishga qaratilgan.

Hamkorlikning asosiy maqsadi O‘zbekiston qimmatli qog‘ozlar bozoriga xalqaro investorlar kirishini kengaytirish, hisobvaraqlar orqali huquqlarni ro‘yxatga olish va qimmatli qog‘ozlarni saqlashning ishonchliligini ta’minlashdan iborat.

Bitim, shuningdek, transchegaraviy operatsiyalar samaradorligini oshirish va ikki mamlakat o‘rtasidagi moliya sektori hamkorligini rivojlantirishga xizmat qiladi.

Tomonlar ushbu integratsiya jarayoni O‘zbekiston kapital bozorining investitsiyaviy jozibadorligini yanada oshirishiga ishonch bildirdilar.