Toshkent, O‘zbekiston (UzDaily.uz) — Raqamli texnologiyalar vaziri Sherzod Shermatov yurtimizda amaliy tashrif bilan bo‘lib turgan Amerika Qo‘shma Shtatlari Prezidentining global sherikliklar bo‘yicha maxsus vakili Paolo Zampolli bilan uchrashuv o‘tkazdi.

Uchrashuv avvalida delegatsiya a’zolari uchun Raqamli texnologiyalar vazirligi hamda IT Park Uzbekistan, “Uzbekkosmos” agentligi faoliyati bo‘yicha taqdimot o‘tkazildi. Shuningdek, mamlakatimizda amalga oshirilayotgan islohotlar, kelgusidagi rejalar va erishilgan natijalar haqida batafsil ma’lumot berildi. Tashrif doirasida, IT mutaxassislarini tayyorlashga ixtisoslashgan Ustudy IT akademiyasi, UZSOC hamda Yagona integrator UZINFOCOM faoliyati bilan tanishtirildi.

Asosiy muzokaralar davomida ikki tomonlama hamkorlikni yangi bosqichga olib chiqish masalalari muhokama qilindi. Xususan, data markazlarni rivojlantirishda hamkorlik qilish, kosmik yo‘nalishda qo‘shma loyihalar amalga oshirish imkoniyatlari, sun’iy intellekt texnologiyalarini joriy etish, raqamli xizmatlar eksportini kengaytirish va startap ekotizimini qo‘llab-quvvatlash kabi yo‘nalishlar bo‘yicha fikr almashildi.

Vazir muzokaralar davomida O‘zbekistonda raqamli iqtisodiyotni rivojlantirish, IT xizmatlar eksportini oshirish va yoshlar uchun yangi imkoniyatlar yaratish bo‘yicha amalga oshirilayotgan ishlar haqida to‘xtalib o‘tdi. Shu bilan birga, mamlakatimizning xalqaro nufuzini oshirish hamda ingliz tilini o‘qitish va rivojlantirish yo‘nalishida amalga oshirilayotgan loyihalar haqida ham ma’lumot berdi.

Uchrashuv yakunida tomonlar raqamlashtirish sohasida hamkorlikni yanada kengaytirish uchun katta salohiyat mavjudligini ta’kidlab, O‘zbekiston va AQSH o‘rtasidagi hamkorlikni yangi bosqichga olib chiqishga tayyor ekanliklarini bildirdi. Paolo Zampolli esa O‘zbekistonda amalga oshirilayotgan keng ko‘lamli islohotlarni yuqori baholab, kelgusida qo‘shma tashabbuslarni amalga oshirishga tayyorligini bildirdi.