O'zbekiston Turkmanboshi porti orqali Yevropaga muntazam blok poyezd qatnovini yo'lga qo'ydi

Toshkent, O‘zbekiston (UzDaily.uz) — 2025-yilda "O‘ztemiryo‘lkonteyner" O'zbekistondan Turkmanboshi porti orqali Yevropa mamlakatlariga muntazam konteyner tashishni muvaffaqiyatli tashkil etdi va Prezidentning temir yo'l tarmog'ini o'zgartirish bo'yicha topshirig'ini bajardi.

O‘zbekiston Respublikasi Prezidentining 2024-yil 31-dekabrdagi “Temir yo‘l sohasida transformatsiya jarayonlarini jadallashtirish to‘g‘risida”gi F-70-sonli Farmoyishida O‘zbekistondan Turkmanboshi portlariga grafik asosida blok poyezdlar qatnovini yo‘lga qo‘yish bo‘yicha muhim vazifalar belgilangan.

Mazkur topshiriq ijrosi doirasida joriy yilda “O‘ztemiryo‘lkonteyner” AJ tomonidan Turkmanboshi porti orqali Yevropa davlatlariga yo‘naltirilgan konteyner tashuvlari yo‘lga qo‘yildi. Xususan, mineral o‘g‘itlar, kaliy, karbamid, alyuminiy va mis kabi yuklar ortilgan jami 18 ta blok poyezdi muvaffaqiyatli jo‘natildi.

Jumladan, 2025 yil davomida Sergeli stansiyasidan 380 ta konteyner, Nazarbek stansiyasidan 228 ta konteyner va Assaka stansiyasidan 25 ta konteyner Yevropaning Italiya, Gretsiya, Turkiya, Bolgariya, Shvetsariya, Ozarbayjon va boshqa qator mamlakatlariga yetkazib berildi.

Mazkur yo‘nalishda blok poyezdlar qatnovining yo‘lga qo‘yilishi O‘zbekiston eksport salohiyatini oshirish, transport-logistika tizimini diversifikatsiya qilish hamda xalqaro transport koridorlaridagi raqobatbardoshlikni mustahkamlashda muhim ahamiyat kasb etadi.