O‘zbekiston TIV: Yaqin Sharqda halok bo‘lganlar va jabrlanganlar orasida mamlakat fuqarolari yo‘q

Toshkent, O‘zbekiston (UzDaily.uz) — O‘zbekiston Tashqi ishlar vazirligi maʼlum qilishicha, ayni paytda Yaqin Sharqdagi vaziyat keskinlashuvi oqibatida halok bo‘lganlar va jabrlanganlar orasida respublika fuqarolari yo‘q. Bu haqda O‘zbekiston Respublikasi Tashqi ishlar vazirligi matbuot xizmati xabar berdi.

«Bugungi kunda O‘zbekiston Respublikasi fuqarolari orasida halok bo‘lganlar va jabrlanganlar mavjud emas. Vaziyat doimiy nazorat ostida», — deyiladi vazirlikning rasmiy bayonotida.

TIVda taʼkidlanishicha, Prezident Shavkat Mirziyoyev topshirig‘iga muvofiq vatandoshlarni Vatanga qaytarishni taʼminlash bo‘yicha tizimli chora-tadbirlar amalga oshirilmoqda. Xususan, vaziyat rivojini inobatga olgan holda hamda O‘zbekiston fuqarolarining xavfsizligini ustuvor tarzda taʼminlash maqsadida muntazam va qo‘shimcha aviaqatnovlar tashkil etilmoqda. Qayd etilishicha, ushbu ishlar doimiy asosda olib borilmoqda.

Tashqi siyosat idorasi maʼlumotiga ko‘ra, hozirgi vaqtda Saudiya Arabistonidan fuqarolarni tizimli evakuatsiya qilish amalga oshirilmoqda, Birlashgan Arab Amirliklaridan Uzbekistan Airways aviakompaniyasining repatriatsiya reysi ishlab chiqilgan, shuningdek aviakompaniyalar bilan charter reyslarini muvofiqlashtirish va mintaqa davlatlari aviatsiya regulyatorlari bilan kelishuv ishlari olib borilmoqda.

TIVda taʼkidlashlaricha, havo hududining yopilishi va «havo hujumi» rejimi amal qilishi munosabati bilan evakuatsiya imkoniyatlari obyektiv ravishda cheklangan. Shunga qaramasdan, diplomatik xizmatlar vaziyat rivojini kuzatib borish hamda O‘zbekiston fuqarolarining xavfsizligini taʼminlash va ularni Vatanga qaytarish bo‘yicha zarur choralarni ko‘rish maqsadida tun-kun ish olib bormoqda.