Toshkent, O‘zbekiston (UzDaily.uz) — Bugun, 6 iyun kuni soat 16:28 da milliy aviakompaniya Uzbekistan Airways‘ga tegishli samolyot Abu-Dabidan Toshkent xalqaro aeroportiga qo‘ndi.

Ushbu reys orqali mamlakatimiz milliy futbol terma jamoasi qaytdi. Jamoa kuni kecha BAA terma jamoasiga qarshi muhim bellashuvni o‘tkazib, 0:0 hisobidagi durang natijasini qayd etdi va O‘zbekiston tarixida ilk bor futbol bo‘yicha Jahon chempionati final bosqichiga yo‘llanmani qo‘lga kiritdi.

Bu tarixiy yutuq munosabati bilan Toshkent aeroportida terma jamoani tantanali kutib olish marosimi bo‘lib o‘tdi.

Marosimda davlat rasmiylari, taniqli sportchilar, sport jamoatchiligi va futbolchilarning oila aʼzolari ishtirok etdi.

Marosimda O‘zbekiston Respublikasi Bosh vaziri Abdulla Aripov ham ishtirok etdi.

Tadbir davomida futbolchilarga yurt sporti taraqqiyoti va mamlakat xalqaro nufuzini oshirishga qo‘shgan ulkan hissalari uchun samimiy minnatdorlik va tabrik so‘zlari yangradi.

Milliy jamoa muvaffaqiyatini eʼtirof etish ramzi sifatida futbolchilarga avtomobillar sovg‘a qilindi.