O‘zbekiston Tashqi ishlar vazirligi G‘azo sektorida o‘t ochishni to‘xtatish va garovga olinganlarni almashishni qo‘llab-quvvatladi

Toshkent, O‘zbekiston (UzDaily.uz) — O‘zbekiston Respublikasi Tashqi ishlar vazirligi G‘azo sektorida o‘t ochishni to‘xtatish va garovga olinganlarni almashish bo‘yicha kelishuvni qo‘llab-quvvatlaydi.

O‘zbekiston Tashqi ishlar vazirligi matbuot kotibi Ahror Burhonov bu kelishuvlar mintaqadagi keskinlikni pasaytirish va uzoq kutilgan tinchlikka erishish yo‘lidagi muhim va ijobiy qadam ekanini ta’kidladi.

Shuningdek, u mazkur kelishuvga erishishda Qatar, AQSH va Misrning ko‘rsatgan sa’y-harakatlariga yuksak baho berdi.

«Biz barcha taraflarni kelishuv shartlariga qat’iy rioya qilishga chaqiramiz», — dedi Ahror Burhonov.

Shu bilan birga, u O‘zbekistonning Yaqin Sharqda barqarorlik va xavfsizlikni ta’minlashga qaratilgan xalqaro sa’y-harakatlarni qo‘llab-quvvatlashga sodiqligini tasdiqladi.