O‘zbekiston tadbirkorlarni kompleks qo‘llab-quvvatlash uchun «Biznes hamroh» tizimini ishga tushiradi

Toshkent, O‘zbekiston (UzDaily.uz) — O‘zbekiston Respublikasi Prezidenti Shavkat Mirziyoyev tadbirkorlik subyektlariga davlat, professional, konsalting, moliyaviy, injiniring, marketing, media, IT va operatsion xizmatlarni kompleks tarzda ko‘rsatish tizimini joriy etish chora-tadbirlari to‘g‘risidagi qarorni imzoladi.

Ushbu hujjat mamlakatda tadbirkorlikni rivojlantirishda yangi bosqichni boshlab beradi. Qaror tadbirkorlar uchun davlat va xususiy xizmatlarni «yagona oyna» tamoyili asosida kompleks ko‘rsatish tizimini joriy etishni nazarda tutadi, bu esa biznesni boshlash va yuritish jarayonlarini sezilarli darajada soddalashtiradi.

Tashabbusning markaziy elementi sifatida «Biznes hamroh» loyihasi belgilanib, uni ishga tushirish 2026 yil 1 martga rejalashtirilgan.

Tizim tadbirkorlik faoliyatini to‘liq qo‘llab-quvvatlashni taʼminlab, yagona kanal orqali mingdan ortiq davlat, professional, konsalting, moliyaviy, injiniring, marketing, media, IT va operatsion xizmatlarni qamrab oladi.

Loyihani boshqarish uchun Savdo-sanoat palatasi huzurida masʼuliyati cheklangan jamiyat shaklida «Biznes hamroh» markazlari tashkil etiladi.

Birinchi bosqichda bunday markazlar Toshkent shahrida, Nukus shahrida va mamlakatning barcha viloyat markazlarida ochiladi.

Yangi markazlar «yagona oyna» tamoyili asosida kompleks xizmatlar ko‘rsatish, yuridik, moliyaviy va marketing yordamini taqdim etish uchun xususiy kompaniyalarni jalb qilish, tadbirkorlar bilan bevosita muloqot uchun sayyor uchrashuvlar va «ochiq eshiklar kunlari»ni o‘tkazish, shuningdek, biznes jamoasining malakasini oshirishga qaratilgan o‘quvlar va seminarlar tashkil etish kabi keng ko‘lamli vazifalarni bajaradi.

Bundan tashqari, markazlar tadbirkorlarning taklif va muammolarini yig‘ish hamda tahlil qilish orqali ularni keyinchalik davlat organlariga kiritib borish bilan shug‘ullanadi.

«Biznes hamroh» loyihasini amalga oshirish O‘zbekistonda biznes uchun qulay muhit yaratish, mamlakatning investitsiyaviy jozibadorligini oshirish va xususiy sektorning jadal rivojlanishini qo‘llab-quvvatlashga qaratilgan.