O‘zbekiston Savdo-sanoat palatasi va Brightman BMC LLC kompaniyasi o‘rtasida uchrashuv

Toshkent, O‘zbekiston (UzDaily.uz) — Birinchi Ozarbayjon Xalqaro Investitsiya forumi doirasida O‘zbekiston Savdo-sanoat palatasi raisi maslahatchisi Alisher Shayxov va Brightman BMC LLC kompaniyasi direktori Afet Axmadova o‘rtasida uchrashuv bo‘lib o‘tdi.

Brightman BMC LLC – 2013 yilda tashkil etilgan bo‘lib, Zira Natural & Gourmet brendi ostida qayta ishlangan oziq-ovqat mahsulotlari ishlab chiqarish va eksport qilishga ixtisoslashgan. 2017 yildan buyon kompaniya mahsulotlari Yevropa, AQSH va Yaponiya kabi bozorlarga muvaffaqiyatli yetkazilmoqda.

Muloqot davomida tadbirkorlik, investitsiya va savdo sohalarida hamkorlikni kengaytirish masalalari muhokama qilindi.

Afet Axmadova kompaniyaning Yevropa, Yaponiya va AQSH bozorlariga muvaffaqiyatli chiqish tajribasiga tayanadigan holda, O‘zbekistonda franchayzing asosida hamkorlik yo‘lga qo‘yishga tayyorligini bildirdi.

Bu yo‘nalish zamonaviy biznes amaliyotlarini joriy etish, yangi ish o‘rinlari yaratish, ayniqsa qishloq hududlardagi xotin-qizlarni ish bilan taʼminlash va mahalliy tadbirkorlarni xalqaro qiymat zanjirlariga integratsiya qilishga xizmat qiladi.

O‘z navbatida, Alisher Shayxov Palataning xalqaro hamkorlikni kengaytirish, shuningdek kichik va o‘rta biznesning barqaror rivojlanishiga ko‘maklashuvchi innovatsion biznes modellarni qo‘llab-quvvatlashga alohida ahamiyat qaratayotganini taʼkidladi.

Uchrashuv yakunida tomonlar uzoq muddatli hamkorlikni rivojlantirishdan o‘zaro manfaatdorlikni tasdiqlab, erishilgan kelishuvlar kelgusida samarali hamkorlikka mustahkam asos bo‘lishini qayd etdilar.