O‘zbekiston Qurilish vazirligi sohaga oid pora haqidagi bayonoti uchun tadbirkorni jazolashni talab qildi

Toshkent, O‘zbekiston (UzDaily.uz) — O‘zbekiston Qurilish va uy-joy kommunal xo‘jaligi vazirligi qurilish sohasida yirik poralar haqida bayonot bergan tadbirkor Usmonjon Abdusamatovni javobgarlikka tortishni talab qildi. Bu haqda vazirlikning rasmiy Telegram-kanalida eʼlon qilindi.

Bayanotda qayd etilishicha, bir necha qurilish kompaniyalari rahbari sifatida tanishtirgan Abdusamatov omma oldida chiqish qilib, Toshkentda uy-joylar qurilishida pora miqdori har bir obyekt uchun 200 ming dollarga yetishi mumkinligini aytgan.

Vazirlik bu so‘zlar «asossiz maʼlumot» tarqalishiga sabab bo‘lganini, ijtimoiy tarmoqlarda katta muhokamalarga olib kelganini, amalga oshirilayotgan islohotlarga nisbatan salbiy munosabat shakllantirayotganini va sohaning hamda vazirlikning obro‘siga putur yetkazayotganini taʼkidladi.

«Shu munosabat bilan Qurilish va uy-joy kommunal xo‘jaligi vazirligi Ichki ishlar vazirligiga Usmonjon Abdusamatovga nisbatan tegishli javobgarlik choralarini qo‘llash yuzasidan rasmiy bayonot yo‘lladi», — deyiladi xabarda.

Vazirlik taʼkidlashicha, qurilish sohasidagi barcha davlat xizmatlari va to‘lovlari faqat elektron tarzda amalga oshiriladi, qo‘shimcha mablag‘ talab qilish qatʼiy taqiqlangan.

Shaharsozlik hujjatlarini olish faqat Yagona interaktiv davlat xizmatlari portali yoki davlat xizmatlari markazlari orqali mumkin, barcha jarayonlar — qurilishga ruxsat berishdan tortib obyektni qabul qilishgacha — «Shaffof qurilish» tizimi orqali amalga oshiriladi.

Tadbirkorning bayonotlari 29 avgust kuni Savdo-sanoat palatasi tomonidan tashkil etilgan ochiq muloqotda yangragan. O‘shanda Abdusamatov ruxsat berishda asossiz rad etishlar uchun javobgarlik joriy etishni taklif qilgan va qiymati taxminan 500 ming dollarlik uylar qurilishida qurilishchilar 20 mingdan 100 ming dollargacha pora berishga majbur bo‘layotganini aytgan, poytaxtda esa xarajatlar bir obyekt uchun 200 ming dollargacha yetishi mumkinligini taʼkidlagan. Shuningdek, u kadastr va arxitektura organlari tomonidan ko‘plab rad etishlar mavjudligini, ular sababli hujjatlarni kelishish jarayoni cho‘zilayotganini bildirgan.