Toshkent, O‘zbekiston (UzDaily.uz) — 2025-yilning 26-27-may kunlari Birlashgan Arab Amirliklarining Dubay shahrida “Qambarota GES-1” loyihasi bo‘yicha vazirlarning ikkinchi davra suhbati bo‘lib o‘tdi. 

Uchrashuvda “Qambarota GES-1” loyihasini jadallashtirish maqsadida aniq vazifalar va ularning bajarilish muddatlari belgilab olindi.

Loyiha Markaziy Osiyoda energetika xavfsizligini mustahkamlash va suv resurslaridan oqilona foydalanishga qaratilgan muhim mintaqaviy tashabbusdir. Tadbir Jahon banki ko‘magida, bankning martabali mehmonlari ishtirokida tashkil etildi.

Davra suhbatida O‘zbekiston, Qozog‘iston va Qirg‘iz Respublikalari Energetika vazirlari boshchiligidagi uch mamlakat Suv xo‘jaligi vazirligi, Iqtisodiyot va moliya vazirligi hamda tegishli energetika kompaniyalari delegatsiyalari ishtirok etdi.