Toshkent, O‘zbekiston (UzDaily.uz) — O‘zbekiston Respublikasi Qishloq xo‘jaligi vazirligi AQSH mehnat vaziri Lori Chaves tomonidan hukumat yig‘ilishida aytilgan xalqaro moliyaviy yordamni qisqartirishga oid fikrlarga munosabat bildirdi.

OAV xabariga ko‘ra, Lori Chaves O‘zbekistondagi paxta sohasida amalga oshirilayotgan islohotlarni moliyalashtirishdan «yetarli darajada shaffoflik yo‘qligi» sababli voz kechilganini aytgan va natijada 250 million dollar tejalganini taʼkidlagan. Go‘yoki ushbu bayonotdan so‘ng Ilon Mask kulib yuborgan.

O‘zbekiston Qishloq xo‘jaligi vazirligi taʼkidlashicha, mazkur yig‘ilish davomida vazirlik bilan bog‘liq hech qanday grant yoki moliyaviy yordam tilga olinmagan. Shuningdek, vazirlik bilan AQSH Mehnat vazirligi o‘rtasida hech qanday bitim yoki shartnoma mavjud emasligi qayd etildi.

«Bu masala bo‘yicha hech qanday muzokaralar olib borilmayapti, hujjatlar yoki kelishuvlar mavjud emas», — deyiladi vazirlik bayonotida.

Shu bilan birga, vazirlik O‘zbekistonda paxta sanoatida mehnat sohasini isloh qilish, majburiy va bolalar mehnatini yo‘q qilish bo‘yicha amaliyotlar haqiqatan ham amalga oshirilayotganini va bu ishlar Xalqaro mehnat tashkiloti (MOT), AQSH Mehnat vazirligi hamda GSP tomonidan bir necha bor yuqori baholanganini tasdiqladi.

Vazirlik OAV va ijtimoiy tarmoq foydalanuvchilarini manbalarni sinchiklab tekshirishga, maʼlumotlarni buzib talqin qilmaslikka va to‘g‘ri axborot muhitini shakllantirishga yordam berishga chaqirdi.