O‘zbekiston Prezidenti uy-joy bozori va ipoteka rivojlantirilishi to‘g‘risidagi farmonni imzoladi

Toshkent, O‘zbekiston (UzDaily.uz) — O‘zbekiston Prezidenti Shavkat Mirziyoyev «Uy-joy bozori va ipotekani barqaror rivojlantirish chora-tadbirlari to‘g‘risida»gi farmonni imzoladi. Hujjat uy-joy qurilishi va aholi uchun uy-joy xarid qilish tizimini muvozanatli shakllantirish, iqtisodiy o‘sish va urbanizatsiya jarayonlaridan kelib chiqib, fuqarolar uchun qulay yashash sharoitlarini yaratishga qaratilgan.

Farmonning asosiy maqsadi — uy-joy sohasini barqaror va muvozanatli rivojlantirish, yillik uy-joy qurilish hajmini ikki barobarga oshirib 421 ming obyektga yetkazish, shuningdek, ipoteka kreditlari portfelini 2040 yilga borib 56,7 milliard AQSH dollarigacha bir necha barobar kengaytirishdir.

Hujjatda qator ustuvor yo‘nalishlar belgilab berilgan: uy-joy fondi o‘sishi va yirik aglomeratsiyalarda urbanizatsiya jarayonlarini qo‘llab-quvvatlash, «Yangi O‘zbekiston» zamonaviy turar-joy massivlarini barpo etish orqali 2040 yilga qadar zamonaviy uy-joy ulushini umumiy tarkibda 50 foizga yetkazish, bank va institutsional mablag‘larni, jumladan ipoteka kreditlarini jalb qilish, ulushli qurilishda investorlar huquqlarini himoya qilish, shuningdek uy-joy sohasini «Uy-joyning yagona hayot sikli» tamoyili asosida kompleks isloh qilish.

Farmonda oldindan tayyorlangan muhandislik, transport va ijtimoiy infratuzilmaga ega tartibda uy-joylar qurilishini tashkil etish, ekologik toza va energiya tejovchi texnologiyalardan foydalanish, shuningdek ko‘chmas mulk egalari huquqlarining kafolatlanishi nazarda tutilgan.

Hujjat ijrosini muvofiqlashtirish uchun Urbanizatsiya, uy-joy bozori va ipotekani barqaror rivojlantirish bo‘yicha Koordinatsiya kengashi hamda Urbanizatsiya va uy-joy bozorini barqaror rivojlantirish bo‘yicha Milliy qo‘mita tashkil etiladi. Ushbu qo‘mita urbanizatsiya, uy-joy qurilishi, renovatsiya va ipoteka kreditlash sohalarida davlat siyosatini amalga oshirish uchun masʼul bo‘ladi.

Milliy qo‘mita Vazirlar Mahkamasi bilan yaqin hamkorlikda ishlaydi va «Yangi O‘zbekiston» loyihalari hamda turli turar-joy massivlari qurilishi dasturlarining amalga oshirilishini, xududlarni tanlashda urbanizatsiya tamoyillariga rioya etilishini nazorat qiladi.

Farmonda tashkiliy chora-tadbirlar ham belgilangan bo‘lib, ular qatorida Kadastr agentligini Milliy qo‘mita tizimiga o‘tkazish, shuningdek uning faoliyatini moliyalashtirish va moddiy-texnik taʼminot tartibini belgilab berish ham mavjud.