O‘zbekiston Prezidenti oliy taʼlim vazirining barcha o‘rinbosarlarini islohotlar tahlilidan so‘ng lavozimidan ozod qildi

Toshkent, O‘zbekiston (UzDaily.uz) — O‘zbekiston Prezidenti Shavkat Mirziyoyev Oliy taʼlim, fan va innovatsiyalar vazirining barcha o‘rinbosarlari ishdan bo‘shatilganini maʼlum qildi.

«Maktabgacha va maktab taʼlimida o‘zgarishlar bo‘lyapti, dasturlar ishlayapti, natijalar bor. Lekin kasb-hunar va oliy taʼlimga masʼul mutasaddilar haligacha taʼlimdagi islohotlar mazmunini to‘liq tushunib yetgani yo‘q», — deya taʼkidladi Prezident taʼlim islohotlarini amalga oshirish va kelgusi vazifalarga bag‘ishlangan videoselektor yig‘ilishida.

Shu bois, oliy taʼlim, fan va innovatsiyalar vazirining barcha o‘rinbosarlari – birinchi o‘rinbosar Shoxruh Daliyev, o‘rinbosarlar Otabek Mahkamov va Sarvarxon Buzrukxonov ishdan olingani eʼlon qilindi.

Shuningdek, Prezident farmoni va qarori bilan Prezident Administratsiyasi huzuridagi Taʼlim sifatini taʼminlash milliy agentligi direktori Adxam Xudaykulov boshqa ishga o‘tishi munosabati bilan hamda Oliy taʼlim, fan va innovatsiyalar vazirligi huzuridagi Innovatsion rivojlanish agentligi direktori Sharof Rajabbayev lavozimidan ozod etildi.