O‘zbekiston Osiyo Kubogi chorak finalida Koreyaga yutqazdi

Toshkent, O‘zbekiston (UzDaily.uz) — O‘zbekiston ayollar terma jamoasi Avstraliyada bo‘lib o‘tayotgan 2026-yilgi Osiyo ayollar kubogi chorak finalida Koreya Respublikasiga 0:6 hisobida yutqazdi. O‘yin Avstraliya stadionida bo‘lib o‘tdi.

Mag‘lubiyatga qaramay, O‘zbekiston jamoasi 2027 yilgi jahon chempionatiga yo‘llanma olish imkoniyatini saqlab qoldi. Terma jamoa turnirda ishtirokini davom ettiradi va qo‘shimcha pley-off bosqichi orqali jahon chempionatiga chiqish uchun kurashadi. Keyingi uchrashuvda Markaziy Osiyo vakilalari Yaponiya va Filippin terma jamoalari o‘rtasidagi chorak final qarama-qarshiligida mag‘lub bo‘lgan jamoa bilan to‘qnash keladi.

O‘zbekiston terma jamoasi bosh murabbiyi Kotrina Kulbite asosiy tarkib bo‘yicha kutilmagan qaror qabul qilib, hujumchilar Nilufar Qudratova, Diyorxon Xabibullayeva va Lyudmila Karachikni zaxira o‘rindig‘ida qoldirdi. Raqib jamoa tarkibida janubiy koreyalik murabbiy Shin San U yarim himoyachi Kim Shin Jini asosiy tarkibga qaytardi, biroq uchrashuv boshlanishiga yaqin hujumchi Chon Yu Gyon o‘rniga Son Xva Yonni maydonga tushirishga majbur bo‘ldi.

Koreya Respublikasi futbolchilari o‘yinni faol boshlab, to‘qqizinchi daqiqada hisobni ochdi. Son Xva Yon Chxve Yu Rining uzatmasini golga aylantirdi, uning pastdan yo‘llangan zarbasi Dilrabo Asadovadan rikoshet olib, O‘zbekiston terma jamoasi darvozaboni Maftuna Jonimqulova ustidan o‘tib ketdi va to‘rga kirdi.

19-daqiqada Jonimqulova Chxve Yu Ri uzatmasidan keyin Son Xva Yonning bosh bilan bergan zarbasini qaytardi. Biroq ko‘p o‘tmay koreyaliklar ustunlikni oshirishdi. Ko Yu Jin uzoq masofadan aniq zarba yo‘llab, to‘pni darvozaning yuqori burchagiga jo‘natdi. Tanaffusgacha Koreya Respublikasi jamoasi yana bir qator xavfli vaziyatlar yaratdi: Son Xva Yon to‘sinni nishonga oldi, Chan Sel Gining kuchli zarbasini esa O‘zbekiston darvozaboni qiyinchilik bilan to‘singa yo‘naltirdi.

Ikkinchi taymda janubiy koreyaliklar ustunligi yana-da yaqqol namoyon bo‘ldi. 57-daqiqada Chon Min Yon burchak to‘pini uzatganidan so‘ng Maftuna Jonimqulova to‘pni mushtlari bilan uzoqlashtirdi, ammo u Pak Su Chjonga kelib tushdi va u kuchli zarba bilan to‘pni darvoza to‘riga jo‘natdi.

To‘rtinchi gol 72-daqiqada Zarina Mamatkarimova jarima maydoni yaqinida to‘pni yo‘qotganidan keyin kiritildi. Tezkor kombinatsiya Ji So Yonning darvozaning pastki burchagiga aniq zarbasi bilan yakunlandi.

Oradan bir necha daqiqa o‘tib, Ji So Yon Kan Chxe Rimni zarba berish uchun qulay pozitsiyaga chiqardi. Jonimqulova uning urinishini qaytardi, ammo birinchi bo‘lib qaytgan to‘pga Li In Yon yetib keldi va uni darvozaga yo‘lladi.

Yakuniy hisob qo‘shimcha vaqtda o‘rnatildi. Li In Yon jarima maydonida Rushxona Usarova tomonidan to‘xtatilganidan so‘ng hakam penalti belgiladi. O‘n bir metrlik nuqtadan berilgan zarbani Chan Sel Gi ishonch bilan golga aylantirdi.

Bu g‘alaba Koreya Respublikasi terma jamoasiga turnir yarim finaliga chiqish hamda 2027 yil Braziliyada bo‘lib o‘tadigan ayollar o‘rtasidagi jahon chempionatida ishtirok etish huquqini taʼminladi. O‘zbekiston terma jamoasi esa jahon chempionatiga yo‘llanma uchun kurashni qo‘shimcha pley-off bosqichida davom ettiradi.