O‘zbekiston noyabr oyida dunyodagi eng yirik oltin xaridorlari uchligiga kirdi

Toshkent, O‘zbekiston (UzDaily.uz) — 2025 yil noyabr oyida O‘zbekiston dunyodagi eng yirik oltin xaridorlari uchligiga kirdi: mamlakat Markaziy banki bir oy ichida 10 tonna qimmatbaho metall xarid qildi. Bu haqda Butunjahon oltin kengashi (World Gold Council)ning navbatdagi hisobotida maʼlum qilingan.

Tashkilot maʼlumotlariga ko‘ra, noyabr oyida markaziy banklarning oltin bo‘yicha sof xaridlari jami 45 tonnani tashkil etgan. Talab o‘sishiga asosiy hissani global iqtisodiy noaniqlik sharoitida oltin zaxiralarini faol oshirayotgan rivojlanayotgan mamlakatlar regulyatorlari qo‘shgan.

Ikkinchi oy ketma-ket eng yirik xaridor Polsha bo‘ldi: uning markaziy banki zaxiralarni 12 tonnaga oshirdi. Undan keyin 11 tonna oltin xarid qilgan Braziliya joy oldi. O‘zbekiston esa 10 tonna oltin sotib olib, uchinchi o‘rinni egalladi va rivojlanayotgan iqtisodiyotlar orasida bozorning eng faol ishtirokchilaridan biri ekanini yana bir bor tasdiqladi.

Salmoqli xaridorlar qatoriga zaxiralarini 8 tonnaga ko‘paytirgan Qozog‘iston ham kirdi. Chexiya, Xitoy va Indoneziyada esa xarid hajmlari nisbatan moʻtadil bo‘ldi.

Shu bilan birga, noyabr oyida markaziy banklar tomonidan oltin sotilishi cheklangan tus oldi. Qimmatbaho metallni faqat Iordaniya, zaxiralarini 2 tonnaga qisqartirib, hamda 1 tonna oltin sotgan Qatar realizatsiya qildi.

Hisobotda shuningdek, yil yakunlariga ko‘ra O‘zbekiston dunyodagi eng yirik oltin sotuvchilari uchligida qolib kelayotgani, bu ko‘rsatkich bo‘yicha faqat Singapur va Rossiyadan ortda ekani qayd etilgan. Bu esa mamlakatning oltin-valyuta zaxiralarini boshqarishda moslashuvchan strategiya yuritayotganini ko‘rsatadi.