Toshkent, O‘zbekiston (UzDaily.uz) — O‘zbekiston Tashqi mehnat migratsiyasi agentligi Yaponiya hududida bo‘lib turgan fuqarolarni firibgarlik holatlari va xorijliklarni noqonuniy faoliyatga jalb etish holatlari ko‘paygani munosabati bilan rasmiy ogohlantiruv eʼlon qildi.

Bayonotda taʼkidlanishicha, O‘zbekiston fuqarolari ayniqsa ehtiyotkor bo‘lishlari va Yaponiya qonunchiligiga zid bo‘lishi mumkin bo‘lgan shubhali takliflardan voz kechishlari lozim. Xususan, ish haqini “konvertda” olish, yaʼni soliqlarsiz noqonuniy tarzda ishlash, ish vizasining bekor qilinishiga olib kelishi mumkin.

Shuningdek, rasmiylashtirilmagan, yashirin ortiqcha ish soatlarini taklif qilish holatlariga ham alohida eʼtibor qaratish lozim — bunday harakatlar Yaponiyaning migratsiya va mehnat qonunlarini buzish demakdir.

Agentlik o‘z fuqarolarini qimor o‘yinlarida ishtirok etmaslikka va shunday faoliyatga jalb qilayotgan shaxslar bilan aloqadan voz kechishga chaqirmoqda. Chunki bu kabi harakatlar Yaponiya qonunlari bilan qatʼiyan taqiqlangan.

Agentlik, shuningdek, yashirincha rezident kartalarini tayyorlash yoki ulardan foydalanish, bank kartalari bilan bog‘liq noqonuniy amaliyotlar, chuqur tekshirilmagan shaxslarga shaxsiy kartalarni berish yoki ularning kartalaridan foydalanish jinoiy javobgarlikka sabab bo‘lishi mumkinligi haqida alohida ogohlantirmoqda.

Agentlik eslatadi: qabul qiluvchi davlat qonunlariga rioya qilish va har qanday “soyali” sxemalardan voz kechish — shaxsiy xavfsizlik va legal maqomni saqlashning asosiy kafolatidir.