Toshkent, O‘zbekiston (UzDaily.uz) — O‘zbekiston Respublikasi Markaziy banki 24 iyul kuniga belgilangan asosiy foiz stavkasi bo‘yicha yig‘ilishni keyinroq muddatga qoldirish to‘g‘risida qaror qabul qildi. Bu haqda regulyator matbuot xizmati xabar berdi.

Markaziy bankda taʼkidlanishicha, qarorning kechiktirilishiga sabab — O‘zbekistonning asosiy savdo hamkorlaridan olinadigan ko‘rsatkichlar, shu jumladan, birinchi yarim yillik bo‘yicha muhim iqtisodiy maʼlumotlarning chop etilishi kutilmoqda. Ushbu maʼlumotlar faqat oy oxirida eʼlon qilinadi.

Regulyatorning taʼkidlashicha, foiz stavkasi bo‘yicha asoslangan qaror qabul qilish uchun barcha dolzarb makroiqtisodiy maʼlumotlarni chuqur tahlil qilish talab etiladi.

Yig‘ilishning yangi sanasi haqida qo‘shimcha ravishda xabar beriladi.