Toshkent, O‘zbekiston (UzDaily.uz) — Oliy Majlis Senatida Gruziya Bosh vaziri Irakliy Kobaxidze rahbarligidagi delegatsiya aʼzolari bilan uchrushuv bo‘lib o‘tdi.

Uchrashuv avvalida Senat Raisi T.Narbayeva martabali mehmonning mamlakatimizga tashrifi ikki davlat o‘rtasida qaror topgan yaqin hamkorlik aloqalarini rivojlantirishda yangi sahifa ochish uchun katta imkoniyat ekanini taʼkidladi.

O‘zbekiston va Gruziya xalqlarining milliy urf-odatlarida uyg‘unlik kuzatiladi, ikki xalq ham mehmondo‘st va o‘z yurtiga sadoqat kabi xususiyatlarga ega. So‘nggi yillarda do‘stlik rishtalari qadimiy anʼanalarga mos ravishda rivojlanmoqda. Ikki millat vakillarini o‘zaro ishonch tuyg‘ulari bog‘lab turibdi.

Toshkentda “O‘zbekiston – Gruziya” do‘stlik jamiyati tuzilgani va  “Megobroba” madaniy markazi faoliyat yurtishi ham fikrimiz tasdig‘idir.

 Suhbat chog‘ida mehmonlarga “O‘zbekiston – 2030” strategiyasida belgilangan ustuvor vazifalar, uning doirasida mamlakatimizda amalga oshirilayotgan keng ko‘lamli islohotlar haqida batafsil maʼlumot berildi.

Nafaqat hukumatlararo, balki parlamentlararo munosabatlarni mustahkamlash, qonunchilikni takomillashtirishda tajriba almashish, ishga solinmagan imkoniyatlardan oqilona foydalanish o‘zaro aloqalarning izchilligini taʼminlaydi, deyildi uchrashuvda.

I.Kobaxidze Gruziya O‘zbekiston bilan yaqin hamkorlikni rivojlantirishdan manfaatdor ekanini bildirdi va yurtimizda barcha sohalarda qo‘lga kiritilayotgan yutuqlarni yuqori baholadi, davlatmiz rahbari olib borayotgan islohotlarning hayotda o‘z ifodasini topayotganini taʼkidladi.

Shuningdek, muloqotda turizm, iqtisodiyot, elektronika, agrar va transport kommunikatsiyasi singari ustuvor yo‘nalishlarda hamkorlik aloqalarini mustahkamlash masalalariga eʼtibor qaratildi.

Uchrashuvda ikki mamlakat o‘rtasida istiqbolli loyihalarni amalga oshirish yuzasidan o‘zaro fikr almashildi, xususan, hamkorlikning bugungi holatini tahlil qilib, yangi rejalarni belgilab olish bilan bog‘liq masalalar muhokama qilindi. 

Gruziya parlamenti rahbarlari yurtimizda bo‘lib o‘tadigan Parlamentlararo ittifoqning 150-yubiley assambleyasida qatnashishga katta qiziqish bildirayotgani qayd etildi, kelgusida ham xalqaro maydonlarda o‘zaro qo‘llab-quvvatlash amaliyotini mustahkamlashga kelishib olindi.