O‘zbekiston fuqarosi Hindistondan vatanga qaytarildi

Toshkent, O‘zbekiston (UzDaily.uz) — O‘zbekistonning Hindistondagi elchixonasi qiyin ahvolda qolgan fuqaro R.R.ga tezkor konsullik-huquqiy yordam ko‘rsatdi.

Ayol hujjatlarini yo‘qotganidan so‘ng va noqonuniy ekspluatatsiya xavfiga duch kelib, shubhali ish beruvchilar tomonidan aldanish ehtimoli paydo bo‘lgani sabab yordam so‘rab murojaat qilgan.

Konsullik bo‘limi darhol Hindistonning huquqni muhofaza qiluvchi organlari va migratsiya xizmatlari bilan aloqa o‘rnatib, uning mamlakatda qonuniy bo‘lib turishi va zarur hujjatlarni rasmiylashtirish masalalarini hal qildi. Diplomatlar hamkorligi tufayli fuqaroni xavfsiz tarzda vatanga qaytarish bilan bog‘liq barcha logistik masalalar ham hal etildi.

14 mart kuni R.R. «Uzbekistan Airways» aviakompaniyasining HY424 reysi orqali sog‘-salomat O‘zbekistonga qaytib keldi.

Elchixona yana bir bor fuqarolarni xorijga safarlar chog‘ida hushyor bo‘lishga, shubhali ish takliflaridan saqlanishga va xorijiy davlatlarda bo‘lish qoidalariga qatʼiy rioya qilishga chaqirdi.