O‘zbekiston elchixonasi Isroilda ehtiyotkorlikka chaqirdi

Toshkent, O‘zbekiston (UzDaily.uz) — O‘zbekiston Respublikasining Isroil Davlatidagi elchixonasi mamlakat fuqarolariga xavfsizlik sohasidagi vaziyat ehtimoliy keskinlashishi munosabati bilan ehtiyotkorlik choralarini kuchaytirishga chaqirib murojaat qildi.

Diplomatik missiya Isroil Ichki front qo‘mondonligining ko‘rsatmalariga qatʼiy rioya qilishni va rasmiy eʼlonlarni diqqat bilan kuzatib borishni tavsiya qildi.

Fuqarolarga himoyalangan binolar yaqinida bo‘lish va havo trevogasi signali yoki sirena tovushi eshitilganda darhol xavfsiz joylarga yashirinish tavsiya etildi. Taʼkidlanishicha, panoh joyni faqat vakolatli organlar tomonidan tegishli ruxsat berilgandan keyingina tark etish lozim.

Elchixona vatandoshlarga xavfsizlik choralariga amal qilayotgani uchun minnatdorlik bildirdi va mavjud vaziyatda hushyorlikni saqlashga chaqirdi.

Favqulodda murojaatlar uchun diplomatik missiyaning ishonch telefonlari ishlashda davom etmoqda, jumladan, shoshilinch holatlar uchun alohida raqam ham mavjud.

Eslatib o‘tamiz, favqulodda murojaatlar uchun quyidagi aloqa raqamlari amal qiladi:
03-672-2466 / 03-672-2371 / 03-758-5075 / 03-758-5076

Shoshilinch va favqulodda holatlar uchun: +972 54-4851397

Elektron pochta: il.uzembassy@mfa.uz