Toshkent, O‘zbekiston (UzDaily.uz) — O‘zbekiston Savdo-sanoat palatasi raisi birinchi o‘rinbosari Davronbek Qurbonov rahbarligidagi delegatsiya Avstriyaning Innsburk shahrida xizmat safari doirasida “INN Cubator” biznes-inkubatori faoliyati bilan tanishdi.

2014 yilda Avstriya Iqtisodiy palatasi va Innsburk universiteti hamkorligida tashkil etilgan ushbu inkubatorning asosiy maqsadi — tanlab olingan startap loyihalarini 6 oy davomida moddiy-texnik jihatdan qo‘llab-quvvatlash va ularni hayotga tadbiq etishga ko‘maklashishdan iborat. Shu vaqtga qadar u 900 dan ortiq loyihaning amalga oshishiga yordam bergan.

Delegatsiya aʼzolari loyihalarni saralash, moliyalashtirish, sinovdan o‘tkazish hamda tayyor mahsulot asosida biznes yo‘lga qo‘yish mexanizmlari haqida batafsil maʼlumotga ega bo‘ldi.

Uchrashuv yakunida O‘zbekistonda biznes-inkubatorlar faoliyatini takomillashtirish bo‘yicha tajriba almashish va hamkorlik yo‘lga qo‘yish, shuningdek ikki mamlakat tashkilotlari o‘rtasida tizimli muloqot o‘rnatishga kelishib olindi.