O‘zbekiston boks federatsiyasi va Asian Boxing o‘rtasida hamkorlik memorandumi imzolandi

Toshkent, O‘zbekiston (UzDaily.uz) — O‘zbekiston boks federatsiyasi va Osiyo boks federatsiyasi Asian Boxing respublikada boksni rivojlantirish va xalqaro tajribani joriy etishga qaratilgan ikki tomonlama hamkorlik memorandumini imzoladi.

Hujjat Asian Boxing prezidenti Pichai Chunxavajiraning Toshkentda bo‘lib o‘tayotgan Osiyo Olimpiya kengashining 46-General assambleyasida ishtirok etish maqsadida O‘zbekistonga tashrifi doirasida imzolandi.

Asian Boxing prezidenti O‘zbekiston boks federatsiyasi prezidentining birinchi o‘rinbosari va Asian Boxing vitse-prezidenti Saken  Polatov bilan uchrashuv o‘tkazdi.

Muzokaralar chog‘ida tomonlar hamkorlikning asosiy yo‘nalishlarini muhokama qilib, yaqin istiqbol uchun ustuvor vazifalarni kelishib oldilar.

Memorandumga muvofiq, mamlakatning har bir hududida zamonaviy boks markazlarini tashkil etish, sportchilar va hakamlarni professional tayyorlashni rivojlantirish, shuningdek samarali mashg‘ulot uslublarini joriy etish nazarda tutilgan.

Shu bilan birga, xorijiy murabbiylar va mutaxassislarni jalb etishga, mahalliy kadrlar malakasini oshirish maqsadida xalqaro o‘quv-mashg‘ulot yig‘inlarini tashkil etishga alohida eʼtibor qaratilgan.