O‘zbekiston banklarni kredit kartalari uchun asossiz to‘lovlar mavjudligini tekshiradi

Toshkent, O‘zbekiston (UzDaily.uz) — Raqobat qo‘mitasi Markaziy bankka tijorat banklarining kredit karta amaliyotlari (operatsiyalari)da isteʼmolchilar huquqlarini himoya qilish yuzasidan so‘rov yubordi

So‘nggi vaqtlarda mamlakatimizda iqtisodiyotning rivojlanishi, bunda aholi turmush tarzini oshirish maqsadida turli shakldagi kreditlar ajratish siyosati qo‘llab-quvvatlab kelinmoqda.

Ammo mazkur amaliyotlarda ayrim davlat va nodavlat tijorat banklari tomonidan taqdim etilgan kredit kartalaridan kommunal xizmatlar, o‘qish, tibbiyot va sug‘urta hamda soliq kabi to‘lovlar ham naqd pulga yechishga tenglashtirilib, ulardan foiz va komissiyalar undirilayotgani o‘z navbatida aholining haqli eʼtirozlariga sabab bo‘lmoqda.

Yuqoridagilarni inobatga olib, Raqobatni rivojlantirish  va isteʼmolchilar huquqlarini himoya qilish qo‘mitasi tomonidan O‘zbekiston Respublikasi “Isteʼmolchilarning huquqlarini himoya qilish to‘g‘risida”gi Qonunining 4, 12, 19,21 va 23-moddalariga muvofiq,

davlat va nodavlat banklar faoliyatini o‘rganib chiqish va ularning faoliyatini kredit kartalari foiz masalalarini qayta ko‘rib chiqish,

isteʼmolchilar manfaatlarini hisobga olgan holda muvofiqlashtirish  hamda  asossiz olingan  xizmat haqi pullarini qaytarish choralarini ko‘rish

yuzasidan O‘zbekiston Respublikasi Markaziy bankiga belgilangan tartibda so‘rov yuborildi.

Ushbu ish tafsilotlari yuzasidan qo‘shimcha axborot taqdim etiladi.