O‘zbekiston AES qurilishi loyihasini amalga oshirish bo‘yicha vazifalarni belgilab oldi

Toshkent, O‘zbekiston (UzDaily.uz) — O‘zbekiston 2026 yilda Jizzax viloyatida atom elektr stansiyasini qurish loyihasini amalga oshirish bo‘yicha vazifalarni belgilab oldi. Asosiy vazifalar va ish bosqichlari O‘zbekiston Respublikasi Prezidentining «Mahalla rivoji va jamiyat farovonligini oshirish yili» doirasida ustuvor yo‘nalishlar bo‘yicha islohotlarni amalga oshirish hamda «O‘zbekiston – 2030» strategiyasiga oid Davlat dasturi to‘g‘risidagi farmon loyihasida mustahkamlab qo‘yilgan.

Birlamchi chora-tadbirlar qatorida VVER va RITM-200N reaktorlari asosida stansiyani qayta konfiguratsiya qilishni inobatga olgan holda shartnomaga qo‘shimcha kelishuvni ishlab chiqish va imzolash nazarda tutilgan. Tayyorgarlik jarayonida yuridik, texnik va moliyaviy sohalarda konsalting xizmatlari jalb etiladi, shuningdek, “Rosatom” davlat korporatsiyasi bilan muzokaralar olib boriladi.

Qo‘shimcha kelishuv loyihasi tegishli vazirlik va idoralar, shuningdek, atom energiyasi va yadroviy texnologiyalarni joriy etish bo‘yicha Idoralararo ilmiy-texnik kengash bilan kelishilgandan so‘ng, uni imzolash va davlat ro‘yxatidan o‘tkazish rejalashtirilgan.

AES maydonida qurilish-montaj kompleksi birinchi navbatini barpo etishga alohida eʼtibor qaratilmoqda. 2026 yilda ishchi hujjatlarni ishlab chiqish, qurilish ishlari boshlanishida davlat nazoratini amalga oshirish, qurilish-montaj ishlarini bajarish va qurilish-montaj kompleksi obyektlarini bosqichma-bosqich ekspluatatsiyaga topshirish ko‘zda tutilgan. Kompleksning birinchi navbatini to‘liq ishga tushirish amaldagi qonunchilikka muvofiq amalga oshiriladi.

Stansiyani ekspluatatsiyaga tayyorlash doirasida AES joylashuvi xavfsizligini asoslovchi hujjatlar to‘plamini tayyorlash yakunlanadi. Texnik topshiriq tasdiqlangandan, shartnoma tuzilgandan va xavfsizlik hisoboti ekspertizadan o‘tkazilgandan so‘ng, loyiha atom elektr stansiyasini joylashtirish uchun rasmiy ruxsatnomaga ega bo‘ladi. Shu bilan birga, AES qurilishida «birinchi beton» bosqichiga o‘tish rejalashtirilmoqda. Buning uchun ustuvor loyiha hujjatlari ishlab chiqiladi, yetkazib beruvchilar tarmog‘i va kirish yo‘llari tayyorlanadi, qurilish litsenziyasi olinadi va shundan so‘ng birinchi beton quyish ishlari boshlanadi.

Loyihaning asosiy bosqichlaridan biri AES uchun yadroviy yoqilg‘ini yetkazib berish bo‘yicha shartnoma tuzish hisoblanadi. Bunda buyurtmachi tomonidan taqdim etilgan boshlang‘ich xom ashyoni qo‘llash imkoniyati ko‘rib chiqiladi, tegishli vazirlik va idoralar bilan shartlar kelishilgandan so‘ng shartnoma imzolanadi.