O‘zbekiston 2030 yilgacha xorijiy turistlar oqimini 20 millionga yetkazishni rejalashtirmoqda

Toshkent, O‘zbekiston (UzDaily.uz) — 2030 yilgacha turistik sohani rivojlantirish maqsadlariga muvofiq, O‘zbekistonda turizmning yalpi ichki mahsulotdagi ulushini hozirgi 3,5 foizdan 7 foizgacha oshirish ko‘zda tutilgan.

Bu investitsiyalarni jalb etish, turistik xizmatlar sifatini oshirish va yangi ish o‘rinlarini yaratish orqali qo‘shimcha iqtisodiy o‘sishni taʼminlash imkonini beradi.

«O‘zbekiston – 2030» takomillashtirilgan strategiya loyihasida xorijiy turistlar oqimini sezilarli darajada ko‘paytirish asosiy vazifalardan biri sifatida belgilangan.

Ayni paytda mamlakatga 11 milliondan ortiq xorijiy fuqaro tashrif buyurmoqda va 2030 yilga kelib ushbu ko‘rsatkichni 20 million kishiga yetkazish, jumladan to‘lov qobiliyati yuqori bo‘lgan turistlar ulushini oshirish hisobidan taʼminlash rejalashtirilgan.

Strategik maqsad sifatida turistik xizmatlar eksporti hajmini yillik 6 milliard AQSH dollaridan oshirish ham belgilangan.

Ushbu ko‘rsatkichga erishish turistik xizmatlar turlarini kengaytirish, raqobatbardosh turistik mahsulotlarni shakllantirish va milliy turistik salohiyatni xalqaro bozorlarda faol targ‘ib qilish orqali taʼminlanadi.

Sohani rivojlantirishda hal qiluvchi omillardan biri infratuzilmani modernizatsiya qilish bo‘lib qolmoqda. Mamlakatning turistik shaharlari o‘rtasidagi transport bog‘liqligini yaxshilash, ichki aviaqatnovlar sonini ko‘paytirish va yo‘lda sarflanadigan vaqtni kamida uch barobar qisqartirish rejalashtirilgan.

Shu bilan birga, 4 va 5 yulduzli mehmonxonalar sonini ikki barobarga oshirish nazarda tutilmoqda, bu esa yuqori darajadagi xizmatlar taklifini kengaytirish imkonini beradi.

Bundan tashqari, turistik mahsulotlarni diversifikatsiya qilishga va hududlarning turistik salohiyatini to‘liq ochib berishga alohida eʼtibor qaratilmoqda.

Ustuvor yo‘nalishlar qatorida O‘zbekistonning jahon miqyosida tan olinadigan turistik brendini shakllantirish, zamonaviy reklama vositalarini joriy etish va mamlakatning xalqaro turistik bozorda nufuzli yo‘nalish sifatidagi mavqeini mustahkamlash belgilangan.