Toshkent, O‘zbekiston (UzDaily.uz) — 2025 yil mart oyida O‘zbekiston Respublikasi Markaziy banki oltin sotish hajmi bo‘yicha jahon markaziy banklari orasida yetakchilikni saqlab qoldi. Jahon oltin kengashi (WGC) hisobotiga ko‘ra, mamlakatning toza sotuvlari 11 tonnani tashkil etdi.

2025 yilning birinchi choragida O‘zbekistonning toza oltin sotuvlari 15 tonnaga yetdi. Shuningdek, Singapur, Qirg‘iziston va Rossiya ham toza sotuvchilar safiga kirdi.

Jahon markaziy banklari orasida eng faol oltin xaridori sifatida Polsha Milliy banki qolmoqda. Uning oltin zaxiralari mart oyida 16 tonnaga, chorak davomida esa 49 tonnaga ko‘paydi.

Oltinni eng ko‘p xarid qilgan beshlikka Ozarbayjon, Xitoy, Qozog‘iston va Chexiya ham kirdi. Mart oyida markaziy banklar tomonidan jami 35 tonna oltin sotib olingan bo‘lsa, 18 tonna sotilgan.