“O‘zbekgidroenergo” Surxondaryo gidrosalohiyatini o‘rganmoqda

Toshkent, O‘zbekiston (UzDaily.uz) — O‘zbekiston Respublikasi Prezidenti Shavkat Mirziyoyevning 2026 yil 26 fevral kuni Surxondaryo viloyatiga tashrifi chog‘ida berilgan topshiriqlar ijrosi doirasida “O‘zbekgidroenergo” aksiyadorlik jamiyati hududning gidroenergetik salohiyatini kompleks o‘rganish ishlarini boshladi.

Jamiyat boshqaruvi raisi Islom Abduraxmonov rahbarligidagi ekspertlar guruhi dengiz sathidan qariyb 3000 metr balandlikda joylashgan Yuqori To‘polang hududini vertolyot orqali ko‘zdan kechirib, tabiiy-relyef sharoiti, suv oqimlari va gidrologik xususiyatlarni tezkor o‘rgandi.

Ishlarning asosiy maqsadi suv resurslaridan samarali foydalanish, elektr energiyasi ishlab chiqarish hajmini oshirish hamda mahalliy aholi manfaatlarini inobatga olgan holda qayta tiklanuvchi energiya manbalarini rivojlantirishdan iborat.

Dastlabki maʼlumotlarga ko‘ra, Yuqori To‘polang hududi bir qator istiqbolli gidroenergetik loyihalarni amalga oshirish imkoniyatini beradi. Ularni bosqichma-bosqich amalga oshirish ekologik toza energiya ishlab chiqarishni oshirish va Surxondaryo viloyatining ijtimoiy-iqtisodiy rivoji uchun zamin yaratadi.

Keyingi «milliy loyiha» doirasida umumiy quvvati 80 MVt bo‘lgan uchta Kishtut gidroelektr stansiyasi kaskadini qurish rejalashtirilgan.

Shuningdek, Zarchob podstansiyasidan Kishtut GESlar stvorigacha 110/220 kV kuchlanishli, umumiy uzunligi 17,791 kilometr bo‘lgan ikki zanjirli havo elektr uzatish liniyasi qurilmoqda. Bu hududning tog‘li va tog‘oldi qismlarida energetika infratuzilmasini mustahkamlash imkonini beradi.

Yuqori To‘polang daryosidagi istiqbolli loyihalarni amalga oshirish uchun topografik ishlar olib borilmoqda.

Mutaxassislarga Mizot daryosi suv oqimi oshishini inobatga olgan holda loyihalarga olib boruvchi yo‘llar qurilishini jadallashtirish, burg‘ulash-portlatish ishlarini xavfsizlik talablariga rioya qilgan holda tashkil etish vazifasi yuklatildi.

Ushbu chora-tadbirlarni izchil amalga oshirish qayta tiklanuvchi energetika ulushini kengaytirish, ekologik toza elektr energiyasi ishlab chiqarishni oshirish hamda Surxondaryo viloyatining barqaror rivojini taʼminlashga xizmat qiladi.