Toshkent, O‘zbekiston (UzDaily.uz) — O‘zbekiston Respublikasi Vazirlar Mahkamasi huzuridagi Atom energetikasi agentligi (“O‘zatom”) va Yevropaning yetakchi kompaniyalaridan biri — italyancha Ansaldo Energia o‘zaro anglashuv to‘g‘risida memorandum imzoladilar. Bu haqda agentlik direktori Azim Ahmedxadjayev o‘zining LinkedIn sahifasida maʼlum qildi.

U taʼkidlaganidek, Italiya Bosh vaziri Jorja Melonining O‘zbekistonga qilgan tashrifi ikki davlat o‘rtasidagi munosabatlarda yangi sahifa ochdi. Samarqandda bo‘lib o‘tgan muzokaralarda strategik sheriklikni kengaytirish masalalari muhokama qilindi hamda bir qator muhim kelishuvlar imzolandi. Shu jumladan, atom energiyasidan tinch maqsadlarda foydalanish bo‘yicha hamkorlik hujjati alohida ahamiyatga ega bo‘ldi.

Memorandum doirasida quyidagi yo‘nalishlarda hamkorlik ko‘zda tutilmoqda:

• Kadrlar salohiyatini oshirish
• Sanoat aloqalarini yo‘lga qo‘yish
• Italiyaning ilg‘or texnologiyalari va tajribasidan foydalanish

Ansaldo Energia — elektr stansiyalari uchun jihozlar, jumladan gaz va par turbinalari loyihalash va ishlab chiqarishga ixtisoslashgan yirik kompaniya. Shuningdek, uning docher kompaniyasi orqali atom energetikasi sohasida ham faoliyat olib boradi:

• Yangi atom stansiyalari loyihalashda innovatsion yondashuv
• Eski obyektlarni xavfsiz tarzda ekspluatatsiyadan chiqarish
• Radioaktiv chiqindilarni samarali boshqarish

Bu hamkorlik O‘zbekistonda atom energetikasi sohasini rivojlantirishda muhim bosqich bo‘lib, sohada xalqaro standartlar va xavfsizlik mezonlariga mos yondashuvlarni joriy etishga xizmat qiladi.