Toshkent, O‘zbekiston (UzDaily.uz) — Joriy yilning 16-fevral kuni Saudiya Arabistonida bo‘lib o‘tayotgan “Rivojlanayotgan mamlakatlar muloqoti” konferensiyasi doirasida Osiyo infratuzilmaviy investitsiyalar banki (OIIB) prezidenti Szin Litsyun hamda O‘zbekiston Respublikasi Bosh vaziri o‘rinbosari – Iqtisodiyot va moliya vaziri Jamshid Qo‘chqorov o‘rtasida uchrashuv bo‘lib o‘tdi.

Osiyo infratuzilmaviy investitsiyalar banki — xalqaro moliyaviy institut bo‘lib, infratuzilma va boshqa mahsuldor sektorlarni rivojlantirish orqali Osiyo mintaqasida iqtisodiy o‘sishni rag‘batlantirish maqsadida tashkil etilgan. Bank 2016-yil 16-yanvarda rasmiy faoliyatini boshlagan va bosh ofisi Pekin (Xitoy) shahrida joylashgan.

Muloqot davomida tomonlar o‘zaro hamkorlik yo‘nalishlari, yashil iqtisodiyotni rivojlantirish, budjetni qo‘llab-quvvatlash hamda infratuzilmani rivojlantirish masalalari yuzasidan muhokamalar olib bordi.

Xususan:

• Yashil o‘sishni ta’minlash – yashil iqtisodiyotni rivojlantirish, iqlim o‘zgarishiga qarshi kurashish hamda energiya samaradorlikni oshirishda hamkorlik olib borish;
• Davlat-xususiy sheriklik loyihalarini rivojlantirish – DXSH dasturlari asosida zamonaviy infratuzilma loyihalarini amalga oshirish;
• Barqaror issiqlik tizimini yaratish – mamlakatimizda zamonaviy va yashil texnologiyalarga asoslangan issiqlik tizimini shakllantirish, xususan, issiqlik nasoslaridan keng foydalanish masalalariga alohida to‘xtalib o‘tildi.

Muzokaralar yakunida tomonlar o‘zaro hamkorlik aloqalarini rivojlantirish hamda belgilangan maqsadlarga erishishda samarali faoliyat olib borishga kelishib oldi.