Toshkent, O‘zbekiston (UzDaily.uz) — Braziliyaning Embraer kompaniyasi 2024-yil 27-dekabrda yangi, noma’lum buyurtmachi uchun ikkita o‘rta turdagi C-390 Millennium harbiy-transport samolyotlarini yetkazib berish bo‘yicha shartnoma tuzganini e’lon qildi.

Shartnoma samolyotlar uchun ehtiyot qismlarni yetkazib berish bilan bir qatorda, kompleks o‘quv va qo‘llab-quvvatlash dasturini ham o‘z ichiga oladi.

Samolyot buyurtmachilarning talablariga mos ravishda moslashtiriladi. Bu talablar quyidagilarni o‘z ichiga oladi: taktik kuchlarni va texnikani tashish, gumanitar yordam ko‘rsatish, favqulodda vaziyatlarda boshqaruv va tibbiy evakuatsiya.

Shartnoma qiymati oshkor qilinmagan, ammo Embraer portfeliga $240 mln qo‘shilgani haqida xabar bergan. Bu summani kelishuv qiymati sifatida taxmin qilish mumkin.

Manbalarning ma’lum qilishicha, kuzatuvchilar bu buyurtmachi O‘zbekiston bo‘lishi mumkinligini taxmin qilmoqda. Chunki 2024-yilda Toshkent va Embraer o‘rtasida bu samolyotlarni sotib olish bo‘yicha muzokaralar o‘tkazilgan edi, deb xabar beradi vpk.name.

Raillynews nashri ham ehtimoliy xaridor sifatida O‘zbekistonni ko‘rsatmoqda.

C-390 Millennium

C-390 Millennium ko‘p maqsadli harbiy-transport samolyoti bo‘lib, u yuqori ishonchlilik, iqtisodiy samaradorlik va universallikni o‘zida jamlagan. U turli vazifalar, jumladan, yuk va shaxsiy tarkibni tashish, tibbiy evakuatsiya, havo orqali yoqilg‘i quyish va boshqa harbiy missiyalarni bajarish uchun mo‘ljallangan. Zamonaviy texnologiyalari va raqobatbardosh narxi tufayli, C-390 xalqaro xaridorlar orasida ommabop bo‘lib qolgan.

Hozirgi vaqtgacha C-390 samolyotlari Portugaliya, Vengriya, Janubiy Koreya, Niderlandiya, Avstriya va Chexiya kabi sakkizta davlat tomonidan xarid qilingan. 2024-yilda Vengriya va Portugaliyaga yirik yetkazib berishlar amalga oshirilgan bo‘lsa, Niderlandiya va Avstriya to‘qqizta samolyot yetkazib berish bo‘yicha shartnoma tuzgan. Bundan tashqari, Shvetsiya va Slovakiya olti va uch samolyot xarid qilishni rejalashtirib, shartnoma oldi kelishuvlari bosqichida turibdi.

Agar O‘zbekiston haqiqatdan ham bu samolyotlarni xarid qilgan bo‘lsa, bu C-390ni Markaziy Osiyo mamlakatlari tomonidan ilk xarid bo‘ladi. Buning o‘zi Toshkentning qurolli kuchlarni modernizatsiya qilishga bo‘lgan intilishini va Braziliya bilan harbiy-texnikaviy hamkorlikni mustahkamlashga bo‘lgan qiziqishini ko‘rsatadi, deya ta’kidlaydi OAV.