Oʻzbekiston xorijiy xizmatlarni soliqqa tortishga aniqlik kiritdi

Toshkent, O‘zbekiston (UzDaily.uz) — O‘zbekistonda xorijiy elektron servislarni soliqqa tortish tartibi yuzasidan rasmiy tushuntirish berildi. O‘zbekiston Respublikasi Istiqbolli loyihalar milliy agentligi va Davlat soliq qo‘mitasi mamlakatda elektron xizmatlar ko‘rsatuvchi xorijiy kompaniyalar, jumladan striming servislarini soliqqa tortish tartibini izohlab berdi.

Vazirlar Mahkamasining 2024 yil 26 dekabrdagi 885-sonli qaroriga muvofiq, 2025 yil 1 iyuldan boshlab O‘zbekiston hududida faoliyat yurituvchi elektron tijorat operatorlari uchun xabardor qilish tartibi joriy etildi. Biroq ushbu qoida xorijdan turib elektron xizmatlar ko‘rsatadigan xorijiy kompaniyalarga tatbiq etilmaydi.

Bunday xorijiy yuridik shaxslar faoliyati Soliq kodeksi normalari bilan tartibga solinadi. Kodeksning 278 va 279-moddalariga ko‘ra, elektron xizmatlar ko‘rsatuvchi xorijiy taʼminotchilar qo‘shilgan qiymat solig‘i to‘lovchilari sifatida qaraladi va mamlakat soliq organlarida hisobga qo‘yilishi lozim.

Ro‘yxatdan o‘tish maxsus elektron servis orqali soddalashtirilgan tartibda amalga oshiriladi va bu jarayon O‘zbekiston hududida yuridik shaxs yoki tadbirkorlik tuzilmasini tashkil etishni talab qilmaydi.

Agar xizmatlar xorijiy vositachilar orqali ko‘rsatilsa, qo‘shilgan qiymat solig‘ini to‘lash majburiyati vositachi zimmasiga yuklanadi. Bunday vositachi ham O‘zbekiston soliq tizimida hisobga qo‘yilishi kerak bo‘ladi.

Soliq kodeksining 282-moddasi soliqqa tortiladigan elektron xizmatlar ro‘yxatini aniq belgilab beradi. Ular qatoriga dasturiy taʼminot, o‘yinlar va maʼlumotlar bazalaridan foydalanish huquqini taqdim etish hamda ularning yangilanishlari, elektron kitoblar, musiqa va audiovizual materiallarga masofaviy kirish imkoniyati, internet-reklama, reklama joylarini taqdim etish, marketpleys xizmatlari, xosting, domen nomlari, bulutli maʼlumot saqlash xizmatlari, qidiruv tizimlariga kirish, veb-saytlar statistikasini yuritish va boshqa raqamli servislar kiradi.