Oʻzbekiston va Utair toʻgʻridan-toʻgʻri aviareyslarni kengaytirishni muhokama qilishdi

Toshkent, O‘zbekiston (UzDaily.uz) —  MITT 2026 xalqaro turizm ko‘rgazmasi ishchi dasturi doirasida O‘zbekiston Respublikasi Turizm qo‘mitasi raisi o‘rinbosari S. Tadjiyevning «Utair» AJ Bosh direktori va Boshqaruv raisi bilan uchrashuvi bo‘lib o‘tdi. Tomonlar Rossiya hududlari va O‘zbekiston o‘rtasidagi aviatsiya aloqalarini rivojlantirish istiqbollarini muhokama qildilar.

Muzokaralar davomida qayd etilishicha, hozirgi kunda «Utair» aviakompaniyasi Rossiyaning turli hududlaridan O‘zbekistonning asosiy shaharlariga — Toshkent, Samarqand, Buxoro va Farg‘onaga to‘g‘ridan-to‘g‘ri reyslarni muvaffaqiyatli amalga oshirmoqda. Asosiy marshrutlar O‘zbekiston shaharlarini Moskva shahridagi Vnukovo aeroporti, shuningdek, Tyumen va Surgut bilan bog‘laydi.

Uchrashuvda qayd etilganidek, 2025-yilda O‘zbekiston Respublikasiga Rossiya Federatsiyasidan 984 mingdan ortiq sayyoh tashrif buyurgan. Hozirda ikki davlat o‘rtasida haftasiga 500 dan ortiq aviareyslar amalga oshirilmoqda va bu ko‘rsatkichlarni yanada oshirish bo‘yicha ishlar faol davom etmoqda.

Tomonlar Sibir, Ural, Shimoliy-G‘arbiy va Uzoq Sharq federal okruglari aholisi tomonidan turizmga bo‘lgan talabning ortib borayotgani alohida ta’kidladilar. Delegatsiya vakillari ushbu hududlar sayyohlarining O‘zbekistonga tashrif buyurishga yuqori qiziqish bildirayotganini qayd etdilar, ammo to‘g‘ridan-to‘g‘ri aviatsiya aloqasining yo‘qligi turistik safarlarning rivojlanishiga to‘sqinlik qilmoqda.

Muzokaralar yakunida tomonlar qo‘shma ishchi guruh tuzish bo‘yicha asosiy kelishuvlarga erishdilar. Ushbu guruhning vazifalari — hozirgi vaziyatni har tomonlama tahlil qilish va aviakompaniya marshrutlar tarmog‘ini kengaytirish bo‘yicha aniq takliflarni ishlab chiqish.

Hamkorlikdagi ishlarning asosiy maqsadi — O‘zbekiston shaharlari bilan bugungi kunda eng yuqori qondirilmagan talab kuzatilayotgan Rossiya hududlari o‘rtasida to‘g‘ridan-to‘g‘ri aviaqatnovlarni yo‘lga qo‘yishdan iborat. Bu ishga har ikki mamlakatning soha vazirlik va idoralarini jalb etish rejalashtirilmoqda. 

Reyslar geografiyasini kengaytirish va ularning sonini oshirish sayyohlar oqimini sezilarli darajada ko‘paytirishga, Rossiyaning uzoq hududlarida yashovchi aholi uchun safarlarni yanada qulay qilishga va ikki davlat o‘rtasidagi biznes hamda madaniy aloqalarni mustahkamlashga imkon beradi.

Tomonlar erishilgan kelishuvlarning amalga oshirilishi aviatashuvlar sohasidagi hamkorlikni sifat jihatdan yangi bosqichga olib chiqishiga hamda yiliga bir milliondan ortiq rossiyalik sayyohni qabul qilish maqsadiga erishishga xizmat qilishiga ishonch bildirdi.