Toshkent, O‘zbekiston (UzDaily.uz) — 2025-yil 27-fevralda O‘zbekiston Respublikasi Prezidenti huzuridagi Ijtimoiy himoya milliy agentligi direktori M.Olloyorov va Turkmaniston mehnat va ijtimoiy himoya vaziri M.Silapov o‘rtasida onlayn uchrashuv bo‘lib o‘tdi.

Uchrashuv ijtimoiy himoya sohasining dolzarb masalalari bo‘yicha fikr almashish bilan boshlandi. Tomonlar hamkorlikni yanada kengaytirishning istiqbolli yo‘nalishlarini batafsil muhokama qildilar.

Turkman tomonini O‘zbekistonda ijtimoiy himoyaga muhtoj aholi qatlamlarini qo‘llab-quvvatlash borasidagi amalga oshirilgan ishlar bilan batafsil tanishtirildi, bir qator yo‘nalishlarda erishilgan sezilarli natijalar ta’kidlandi hamda kelgusida amalga oshirilishi rejalashtirilgan ishlar to‘g‘risida ma’lumot berildi.

Muzokaralar natijasida tomonlar bir qator istiqbolli yo‘nalishlarda hamkorlikni rivojlantirishga kelishdilar. Xususan:

– mahalla darajasida ijtimoiy xizmatlar tizimini rivojlantirish, ijtimoiy zaif aholi guruhlariga xizmat ko‘rsatish samaradorligini oshirish;

– o‘zgalar parvarishiga muhtoj shaxslar uchun qarab turish xizmatlari tizimini rivojlantirish;

– nogironligi bo‘lgan shaxslar reabilitatsiyasini takomillashtirish bo‘yicha tajriba almashish;

– ijtimoiy xizmatlar ko‘rsatish jarayonlarini optimallashtirish va ularning qulayligini oshirish maqsadida ijtimoiy himoya sohasini raqamlashtirish.

Agentlik direktori Turkmaniston mehnat va ijtimoiy himoya vazirini yurtimizda amalga oshirilayotgan ijtimoiy himoya sohasidagi loyihalar bilan yaqindan tanishtirish hamda hamkorlik yuzasidan batafsil muzokaralar o‘tkazish maqsadida O‘zbekistonga taklif qildi. Uchrashuv ochiq va konstruktiv muhitda, ishchan va do‘stona ruhda o‘tdi.