Oʻzbekiston va Turkmaniston energetika sohasidagi hamkorlikni mustahkamlamoqda

Toshkent, O‘zbekiston (UzDaily.uz) — Ashxobodda O‘zbekiston elchisi Ravshanbek Alimovning Turkmaniston Vazirlar Mahkamasi Raisi o‘rinbosari Guvanch Agadjanov bilan uchrashuvi bo‘lib o‘tdi, deb xabar bermoqda “Dunyo” AA muxbiri.

Tomonlar yoqilg‘i-energetika sohasidagi ikki tomonlama hamkorlikni yanada rivojlantirishning dolzarb masalalarini muhokama qildilar.

Ikki davlat rahbarlarining qat’iy siyosiy irodasi va sa’y-harakatlari tufayli davlatlararo munosabatlar so‘nggi yillarda sifat jihatidan yangi bosqichga ko‘tarilgani, barcha soha va yo‘nalishlarda ikki tomonlama hamkorlik izchil rivojlanib borayotgani qayd etildi.

Yoqilg‘i-energetika sohasidagi hamkorlik muntazam ravishda kengayib, yangi mazmun va amaliy natijalar bilan boyib borayotganini ta’kidlandi.

Uchrashuvda, shuningdek, neft-gaz tarmog‘ida kooperatsiya aloqalarini rivojlantirish bo‘yicha fikr almashildi.