Oʻzbekiston va Rossiya mehnat migratsiyasini soddalashtirish masalalarini muhokama qilishdi

Toshkent, O‘zbekiston (UzDaily.uz) — O‘zbekiston Prezidentining 2024-yil 17-oktabrdagi 367-sonli “Chet elda mehnat faoliyati jarayonlarini tartibga solish bo‘yicha qo‘shimcha chora-tadbirlar to‘g‘risida”gi Farmoni ijrosini ta’minlash doirasida O‘zbekiston tashqi ishlar vaziri o‘rinbosari Olimjon Abdullayev Rossiya Federatsiyasining O‘zbekistondagi Favqulodda va Muxtor Elchisi Aleksey Yerxov bilan uchrashuv o‘tkazdi.

Suhbat davomida O‘zbekiston fuqarolarining Rossiyada mehnat migratsiyasini tartibga solish masalalari muhokama qilindi. Tomonlar “pilot loyiha”ni qayta yo‘lga qo‘yish, jumladan, migratsiya tartib-taomillarini, tibbiy ko‘rikni, rus tili imtihonini Toshkent va Jizzaxdagi Rossiya oliy o‘quv yurtlari filiallariga ko‘chirish, rus tili, tarixi va qonunchiligi bo‘yicha o‘quv markazlarini tashkil etish, kasbiy ta’lim tizimida o‘qituvchilar va ishlab chiqarish xodimlarini tayyorlashga Rossiyadan mutaxassislarni jalb etish masalalarida fikr almashdilar.

Shuningdek, migratsiya reydlari davomida O‘zbekiston fuqarolarining huquqlari buzilishi yoki kamsitilishiga yo‘l qo‘ymaslik masalasiga alohida e’tibor qaratildi.

Migratsiya oqimlarini tartibga solish bo‘yicha yaratilgan ishchi guruh doirasida yuzaga kelayotgan masalalarni tezkor hal etish maqsadida muntazam uchrashuvlar o‘tkazib borish to‘g‘risida kelishuvga erishildi.