Oʻzbekiston va Qozogʻiston 2030-yilga qadar 10 milliard dollarlik maqsad doirasida savdo va investitsiyalarni kengaytirishni muhokama qilishdi

Toshkent, O‘zbekiston (UzDaily.uz) — 2026-yil 30-yanvar kuni O‘zbekiston Respublikasi Investitsiyalar, sanoat va savdo vaziri Laziz Kudratov Qozog‘iston Respublikasining O‘zbekistondagi Favqulodda va Muxtor Elchisi Beybut Atamkulov bilan uchrashuv o‘tkazdi.

Tomonlar savdo-iqtisodiy, investitsiyaviy hamda transport sohalaridagi hamkorlikning bugungi holati va istiqbollarini muhokama qildilar. O‘zaro savdoda barqaror ijobiy dinamika qayd etildi hamda 2030-yilgacha o‘zaro savdo hajmini 10 milliard AQSH dollariga yetkazish bo‘yicha Qo‘shma dastur doirasida tovar ayirboshlashni yanada kengaytirishga tayyorlik tasdiqlandi.

2025-yil yakunlariga ko‘ra, o‘zaro tovar ayirboshlash hajmi 4,97 milliard AQSH dollarini tashkil etib, 11,4 foizga oshdi. Jumladan, eksport 1,55 milliard AQSH dollariga yetib, o‘tgan yilga nisbatan 1,2 foizga ko‘paydi, import esa 3,4 milliard AQSH dollarini tashkil etib, 16,6 foizga o‘sdi.

Shuningdek, 2026-yilda ikki mamlakat Hududlar rahbarlari kengashining birinchi yig‘ilishini o‘tkazish hamda “Made in Uzbekistan” va “Made in Kazakhstan” sanoat ko‘rgazmalarini tashkil etish masalalari ko‘rib chiqildi.

Uchrashuv yakunida strategik sheriklikni yanada chuqurlashtirish, investitsiyaviy hamkorlikni kengaytirish va muntazam konstruktiv muloqotni davom ettirishga o‘zaro tayyorlik tasdiqlandi.