Oʻzbekiston va Polsha qishloq xoʻjaligi sohasidagi hamkorlikni muhokama qilishdi

Toshkent, O‘zbekiston (UzDaily.uz) — Joriy yilning 27 noyabr kuni O‘zbekiston Savdo-sanoat palatasida Polsha Respublikasi qishloq xo‘jaligi va qishloqni rivojlantirish vaziri Stefan Krayevskiy boshchiligidagi delegatsiya bilan ikki tomonlama uchrashuv bo‘lib o‘tdi.

Tadbirda O‘zbekiston tomonidan Savdo-sanoat palatasi, Texnik jihatdan tartibga solish agentligi hamda qishloq xo‘jaligi va qayta ishlash sohasida faoliyat yuritayotgan yirik korxonalar vakillari ishtirok etdi.

Uchrashuvni Savdo-sanoat palatasi raisi maslahatchisi Alisher Shayxov ochib, O‘zbekistonda amalga oshirilayotgan iqtisodiy islohotlar, xususiy sektorni qo‘llab-quvvatlash siyosati hamda sanoat va agrar sohalarda kuzatilayotgan barqaror o‘sish tendensiyalari haqida maʼlumot berdi.

Shuningdek, uchrashuvda meva-sabzavot, sut-go‘sht va parrandachilik mahsulotlarining eksport salohiyati, sanoat va agrar kooperatsiyani rivojlantirish masalalari muhokama qilindi. O‘zbekiston va Polsha kompaniyalarining Yevropa, Markaziy Osiyo, MDH, Xitoy, Yaqin Sharq va Afg‘oniston bozorlariga qo‘shma mahsulotlarni yetkazib berish uchun logistik-ishlab chiqarish xablari sifatidagi salohiyati alohida qayd etildi.

Texnik jihatdan tartibga solish agentligi direktori Akmal Jumanazarov milliy standartlashtirish va sertifikatlashtirish tizimini xalqaro talablarga moslashtirish bo‘yicha amalga oshirilayotgan ishlar haqida maʼlumot berdi.

Polsha tomoni go‘sht-sut mahsulotlarini qayta ishlash, urug‘chilik, oziq-ovqat sanoati, energiyaning muqobil manbalari, gidroponika, veterinariya va fitosanitar nazorat kabi yo‘nalishlarda qo‘shma loyihalarni amalga oshirishga tayyorligini bildirdi.

Uchrashuvda, shuningdek, ikki mamlakatda mahsulot va yuklarni qayta ishlashni taʼminlaydigan qo‘shma sanoat-logistika markazlarini tashkil etish masalasi ham ko‘rib chiqildi. Har bir yo‘nalish bo‘yicha ishchi guruhlar tuzish va mutaxassislar o‘rtasida o‘zaro tashriflar almashish yuzasidan kelishuvga erishildi.

Uchrashuv ikki davlat o‘rtasidagi savdo, sanoat va agrar texnologiyalar sohasidagi hamkorlikni kengaytirishda muhim qadam bo‘ldi.