Oʻzbekiston va Polsha qishloq xoʻjaligi mahsulotlari savdosini rivojlantirmoqda

Toshkent, O‘zbekiston (UzDaily.uz) — O‘zbekiston Respublikasi Investitsiyalar, sanoat va savdo vaziri Laziz Kudratov hamda Polsha qishloq xo‘jaligi va qishloqlarni rivojlantirish vaziri Stefan Krayevski o‘rtasida muzokaralar bo‘lib o‘tdi.

Tomonlar savdo-iqtisodiy hamkorlikning bugungi holati va istiqbollarini muhokama qildilar.

Asosiy e’tibor o‘zaro qishloq xo‘jaligi mahsulotlari aylanmasini ko‘paytirish, yetkazib berish hajmini kengaytirish hamda oziq-ovqat mahsulotlarini qayta ishlash va logistikani rivojlantirish bo‘yicha qo‘shma loyihalarni amalga oshirishga qaratildi.

2025-yilda mamlakatlar o‘rtasidagi tovar ayirboshlash hajmi 382,7 million dollarni tashkil etdi.

Bugungi kunda O‘zbekistonda energetika, to‘qimachilik, qurilish materiallari ishlab chiqarish, farmatsevtika va agrosanoat tarmoqlarida Polsha kapitali ishtirokidagi 49 ta korxona faoliyat ko‘rsatmoqda.

Uchrashuvda taqsimot markazlarini tashkil etish, kompaniyalarning xalqaro ko‘rgazmalardagi ishtiroki hamda ishbilarmon doiralar o‘rtasidagi to‘g‘ridan-to‘g‘ri aloqalarni mustahkamlash masalalari ko‘rib chiqildi.

Muzokaralar yakunida ikki tomonlama sheriklikni rivojlantirishga qaratilgan yangi tashabbuslarni ilgari surish bo‘yicha o‘zaro tayyorlik bildirildi.