Oʻzbekiston va Polsha oziq-ovqat taʼminotini kengaytirish masalalarini muhokama qilishdi

Toshkent, O‘zbekiston (UzDaily.uz) — Qishloq xo‘jaligi vaziri maslahatchisi Nuriddin Qo‘shnazarov hamda Polsha Respublikasi Qishloq xo‘jaligi va qishloqlarni rivojlantirish vaziri Stefan Kraevski “Korzinka” supermarketlar tarmog‘i asoschisi Zafar Hoshimov bilan uchrashuv o‘tkazdi.

Muloqot chog‘ida ikki tomonlama savdo-iqtisodiy hamkorlikni kengaytirish, oziq-ovqat ta’minotini diversifikatsiya qilish hamda bozorga yangi mahsulotlarni yetkazib berish bo‘yicha istiqbolli yo‘nalishlar muhokama qilindi.

Uchrashuv avvalida Zafar Hoshimov “Korzinka” tarmog‘ining faoliyati, respublika miqyosida aholiga sifatli va barqaror ta’minot yaratishdagi o‘rni haqida batafsil ma’lumot taqdim etdi.

Suhbat davomida Polsha mahsulotlarini O‘zbekiston bozoriga olib kirishda “Korzinka” tarmog‘i muhim sherik sifatida katta imkoniyatlarga ega ekani ta’kidlandi. Tarmoqning yirik logistika infratuzilmasi va keng savdo maydoni Polsha kompaniyalari uchun ishonchli platforma sifatida alohida qayd etildi.

Polsha delegatsiyasi O‘zbekistonga o‘z mahsulotlarini muntazam va tizimli ravishda eksport qilishga tayyorligini bildirdi. Jumladan, shakar yetkazib berish bo‘yicha dastlabki takliflar taqdim etildi. Shuningdek, oziq-ovqatning boshqa turlari va qayta ishlangan mahsulotlarni eksport qilish bo‘yicha ham keng qamrovli rejalar ilgari surildi.

Uchrashuv yakunida tomonlar savdo almashinuvini oshirish, Polshaning sifatli mahsulotlarini O‘zbekiston iste’molchilariga yetkazish va chakana savdo tarmog‘i bilan uzoq muddatli hamkorlikni mustahkamlash bo‘yicha o‘zaro fikr almashdilar.

Mazkur uchrashuv ikki davlat o‘rtasidagi manfaatli sheriklikni yanada kengaytirishga xizmat qiladigan muhim qadam bo‘ldi.