Oʻzbekiston va Gretsiya savdo-iqtisodiy hamkorlik va biznes aloqalarini faollashtirishga kelishib oldilar

Toshkent, O‘zbekiston (UzDaily.uz) — O‘zbekiston Savdo-sanoat palatasi raisi maslahatchisi Alisher Shayxov Gretsiyaning O‘zbekistondagi Favqulodda va Muxtor elchisi Paraskevi Seveleki bilan uchrashuv o‘tkazdi.

Muzokaralar markazida — savdo-iqtisodiy hamkorlikni kengaytirish va ikki davlat ishbilarmon doiralari o‘rtasida to‘g‘ridan-to‘g‘ri aloqalarni faollashtirish masalalari bo‘ldi. Tomonlar qo‘shma loyihalar sonini oshirish va biznes uchun yangi imkoniyatlar yaratish muhimligini taʼkidladilar.

Joriy yilning sentyabr oyida Gretsiya biznes delegatsiyasining O‘zbekistonga tashrifi rejalashtirilmoqda. Tashrif doirasida qo‘shma biznes-forum hamda B2B uchrashuvlar o‘tkazilishi kutilmoqda. Bu tadbirlar tadbirkorlarga to‘g‘ridan-to‘g‘ri sherik topish va amaliy kelishuvlarga erishish imkonini beradi.

Uchrashuvda O‘zbekistonning investitsion salohiyati, ustuvor tarmoqlar va hamkorlik uchun mavjud sharoitlar haqida ham maʼlumot taqdim etildi.

Yakunda tomonlar ishbilarmonlik aloqalarini yangi bosqichga olib chiqishga tayyor ekanliklarini bildirib, kelishilgan tashabbuslarni amalga oshirish bo‘yicha hamkorlikni davom ettirishga kelishib oldilar.