Oʻzbekiston va BAA CITES CoP20 sammitida atrof-muhitni muhofaza qilish boʻyicha hamkorlikni muhokama qilishdi

Toshkent, O‘zbekiston (UzDaily.uz) — Samarqandda bo‘lib o‘tayotgan Yovvoyi fauna va flora turlari xalqaro savdosi to‘g‘risidagi konvensiyaning 20-sessiyasi (CITES CoP20) doirasida O‘zbekiston Respublikasi Prezidentining ekologiya masalalari bo‘yicha maslahatchisi — Ekologiya va iqlim o‘zgarishi milliy qo‘mitasi raisi Aziz Abduhakimov Birlashgan Arab Amirliklarining iqlim o‘zgarishi va atrof-muhit vaziri, Vazirlar Mahkamasi a’zosi Amna bint Abdullo Al-Dahak Al-Shamsi bilan uchrashdi.

Muzokaralar davomida tomonlar tabiatni muhofaza qilish, ekotizimlarni barqaror boshqarish va noyob turlarni saqlash borasida ikki tomonlama hamkorlikni kengaytirish masalalarini muhokama qildi.

Vazir Amna Al-Dahak O‘zbekistonda Xitoy Fanlar akademiyasining Shinjon ekologiya va geografiya instituti bilan hamkorlikda tashkil etilgan mintaqaviy markaz ochilgani munosabati bilan samimiy tabrik yo‘lladi.

U bu tashabbusni Markaziy Osiyoda ekologik monitoringni rivojlantirishga qo‘shilgan muhim ilmiy-amaliy hissa sifatida yuqori baholadi.

BAA tomonining ta’kidlashicha, ular Xitoy bilan birgalikda “cho‘l iqtisodiyoti” konsepsiyasi asosida cho‘l hududlarini o‘zlashtirish va barqaror rivojlantirish bo‘yicha hamkorlikni kengaytirishga tayyor. Shu bilan birga, O‘zbekiston ishtirokida uch tomonlama sheriklik mexanizmlarini yo‘lga qo‘yish imkoniyatlari ham ko‘rib chiqilmoqda.

Uchrashuvda yirtqich qushlarni asrash va ularni hisobga olish tizimini takomillashtirish masalalariga alohida e’tibor qaratildi. Amna Al-Dahak BAA tomonidan ilgari surilayotgan lochinlarni ro‘yxatga olish va raqamli identifikatsiya qilish tashabbuslarini qo‘llab-quvvatlashga chaqirdi.

Unga ko‘ra, raqamli pasportlar tizimini joriy etish noyob turlarni ko‘chirish ustidan nazoratni mustahkamlab, CITES doirasida xalqaro hamkorlikni kengaytiradi.

Aziz Abduhakimov BAA bilan hamkorlikni yanada kengaytirish va mintaqada kuchayib borayotgan ekologik chaqiriqlar sharoitida tajriba almashish muhim ekanligini ta’kidladi.

Tomonlar amaliy hamkorlikni davom ettirishga, tegishli vazirlik va ilmiy tashkilotlar darajasida yangi qo‘shma tashabbuslarni ko‘rib chiqishga kelishib oldi.