Toshkent, O‘zbekiston (UzDaily.uz) — 2025-yil 29-avgust kuni O‘zbekiston Respublikasi Investitsiyalar, sanoat va savdo vaziri o‘rinbosari Akram Aliyev “Alliance Strategic Advisors LLC” kompaniyasi Prezidenti Kurt Volker hamda “Cintana Education”ning Sharqiy Yevropa va Markaziy Osiyo bo‘yicha Bosh direktori Chag‘ri Bag‘chiog‘lu bilan uchrashdi.

Suhbat chog‘ida tomonlar O‘zbekiston–AQSH munosabatlarining joriy holati va istiqbollarini muhokama qilib, hamkorlikning ustuvor yo‘nalishlari sifatida: strategik minerallar, kimyo sanoati, sog‘liqni saqlash, infratuzilma va ta’lim sohalarini belgilab oldilar.

Alohida e’tibor ta’lim sohasiga qaratilib, xususan 2024-yilda Toshkent shahrida Arizona shtati universiteti va “Cintana Education” hamkorligida tashkil etilgan Amerika Texnologiyalar Universitetining rivojlanish masalalari muhokama qilindi. Mazkur oliygoh yetti bakalavriat va uch magistratura dasturi bo‘yicha o‘qitishni amalga oshirib, muhandislik, IT va boshqa dolzarb yo‘nalishlarda yuqori malakali kadrlar tayyorlamoqda.

Muzokaralar yakunida tomonlar O‘zbekiston va AQSH o‘rtasidagi ta’limiy hamda iqtisodiy hamkorlikni kengaytirishga qaratilgan yangi tashabbuslarni ishlab chiqish va muntazam muloqotni davom ettirishga kelishib oldilar.