Oʻzbekiston Prezidenti va Pokiston Bosh vaziri strategik sheriklikni yanada rivojlantirishning ustuvor yoʻnalishlarini belgilab berdilar

Toshkent, O‘zbekiston (UzDaily.uz) — 5-fevral kuni Islomobod shahrida Oʻzbekiston Respublikasi Prezidenti Shavkat Mirziyoyev va Pokiston Islom Respublikasi Bosh vaziri Shahboz Sharif tor doirada muzokara hamda oliy darajadagi Strategik hamkorlik kengashining birinchi yigʻilishini oʻtkazdilar.

Davlatimiz rahbari uchrashuv avvalida Bosh vazirni yaqinlashib kelayotgan muqaddas Ramazon oyi va Pokiston kuni bayrami bilan tabrikladi.

Oliy darajada erishilgan kelishuvlarni amalga oshirish doirasida Oʻzbekiston – Pokiston strategik sheriklik va koʻp qirrali hamkorlik munosabatlarini yanada kengaytirish va mustahkamlashning amaliy jihatlari atroflicha muhokama qilindi.

Soʻnggi yillarda oʻzaro aloqalar faol tus olgani mamnuniyat bilan qayd etildi. Siyosiy muloqot mustahkamlanib, parlamentlararo va idoralararo almashinuvlar jadal rivojlanmoqda.

Oʻtgan yil yakunlariga koʻra oʻzaro savdo hajmi salkam 500 million dollarga yetdi. Oʻzbekistonda Pokiston kapitali ishtirokidagi 230 ga yaqin korxona faoliyat yuritmoqda. Ikki mamlakat oʻrtasidagi aviaqatnovlar koʻpaydi. Banklararo korrespondentlik munosabatlari mustahkamlanmoqda.

Toʻqimachilik, farmatsevtika, kimyo, qishloq xoʻjaligi va boshqa sohalarda kooperatsiya loyihalari muvaffaqiyatli amalga oshirilmoqda.

Tomonlar ushbu tashrif arafasida oʻtkazilgan siyosiy maslahatlashuvlar va Hukumatlararo komissiya yigʻilishining natijalarini olqishladilar.

Tashrif doirasida Oʻzbekiston sanoat mahsulotlarining koʻrgazmasi oʻtkazilmoqda.

Ikki mamlakat tashqi ishlar vazirliklari Muvofiqlashtiruvchi qoʻmitasining birinchi yigʻilishini yaqin kunlarda Toshkentda oʻtkazish zarurligi taʼkidlandi.

Ishbilarmon doiralar oʻrtasida uzoq muddatli hamkorlik oʻrnatish maqsadida Oʻzbekiston – Pokiston Ishbilarmonlar kengashini tashkil etish yuzasidan kelishuvga erishildi.

Yaqin kelajakda oʻzaro tovar ayirboshlashni 2 milliard dollarga yetkazish vazifasi qoʻyildi. Amaldagi Imtiyozli savdo bitimi doirasidagi mahsulotlar turini, shuningdek, Oʻzbekiston qishloq xoʻjaligi mahsulotlari uchun fitosanitariya ruxsatnomalari roʻyxatini yanada kengaytirish hamda Oʻzbekistonning Lahor va Karachidagi savdo uylaridan faol foydalanish toʻgʻrisida qarorlar qabul qilindi.

Tashrifga tayyorgarlik doirasida qishloq xoʻjaligi, elektrotexnika, geologiya, farmatsevtika, yengil sanoat, oziq-ovqat mahsulotlarini qayta ishlash va boshqa sohalarda qariyb 3,5 milliard dollarlik loyihalar portfeli shakllantirildi.

Transport va logistika aloqalarini rivojlantirishga alohida eʼtibor qaratildi. Transafgʻon temir yoʻli loyihasini amalga oshirishni jadallashtirish va “Pokiston – Xitoy – Qirgʻiziston – Oʻzbekiston” transport yoʻlagini rivojlantirish muhimligi taʼkidlandi.

Ikki mamlakat hududlarining oʻzaro aloqalari iqtisodiy hamkorlik rivojining asosiy drayverlaridan biri sifatida belgilandi.

Oʻzbekiston – Pokiston hududlararo forumini tashkil etishga kelishilib, uning birinchi uchrashuvini shu yil Xorazm viloyatida oʻtkazish taklifi bildirildi.

Ziyorat turizmi sohasida tizimli hamkorlikni yoʻlga qoʻyish masalalari alohida muhokama qilindi. Ikki mamlakat xalqlari oʻrtasidagi doʻstlikni mustahkamlash maqsadida joriy yilda Pokistonda Oʻzbekiston madaniyati haftaliklari va Oʻzbekiston kinosi kunlarini oʻtkazishga kelishib olindi.

Shuningdek, davlatimiz rahbari Boburiylar merosini targʻib qilish uchun Lahorda qoʻshma madaniyat markazini tashkil etishni taklif qildi.

Muzokaralar davomida xalqaro va mintaqaviy kun tartibidagi dolzarb masalalar yuzasidan fikr almashilib, koʻp tomonlama tuzilmalar doirasida yaqin hamkorlikni davom ettirishga qatʼiy intilish bildirildi.

Yakunda Shavkat Mirziyoyev Shahboz Sharifni javob tashrifi bilan Oʻzbekistonga kelishga taklif etdi.