Oʻzbekiston koʻp qavatli uylar va isitish tizimlarini keng koʻlamli elektrlashtirishga tayyorgarlik koʻrmoqda

Toshkent, O‘zbekiston (UzDaily.uz) — Hozirgi vaqtda cheklangan energiya resurslaridan oqilona foydalanish hamda iste’mol madaniyatini oshirish maqsadida Energetika vazirligi tomonidan qayta tiklanuvchi energiya manbalari hisobidan energiya iste’molini qoplash yo‘nalishida tizimli ishlar amalga oshirilmoqda.

Jahon tajribasi shuni ko‘rsatadiki, Belorussiya, Xitoy va qator Yevropa davlatlarida energiya iste’molini to‘liq dekarbonizatsiya qilish, “Zero carbon – eco home” tamoyillari asosida uy-joylar qurish va iste’molni to‘liq elektrlashtirish amaliyoti muvaffaqiyatli joriy etilgan. Mazkur yondashuv dunyo mamlakatlarida keng ommalashmoqda.

Energetika vazirligining maʼlumotlariga koʻra, O‘zbekistonda ham energiya iste’moli madaniyatini oshirish, yangi barpo etilayotgan ko‘p qavatli turar-joylarni to‘liq elektrlashtirish, ovqat tayyorlash uchun elektr plitalari bilan ta’minlash, isitish tizimini elektr energiyasiga o‘tkazish hamda tabiiy gaz tarmoqlariga ulanmagan ko‘p xonadonli uylar, yotoqxonalar va gazlashtirilmagan hududlardagi hovlilar uchun imtiyozli tariflarni joriy etish bo‘yicha hisob-kitoblarga asoslangan takliflar ishlab chiqilgan.

Mazkur takliflar loyihasiga ko‘ra, ovqat tayyorlash uchun elektr plitalari bilan jihozlangan, isitish tizimi to‘liq elektrlashtirilgan, markazlashgan isitish tizimi va tabiiy gaz tarmoqlariga ulanmagan ko‘p qavatli uylar, yotoqxonalar hamda gazlashtirilmagan hududlarda yashovchi maishiy iste’molchilarga (subsidiyalanadigan narxlardagi suyultirilgan gaz, ko‘mir yoki tabiiy gazdan foydalanmagan taqdirda) oylik iste’mol hajmiga qarab: isitish mavsumida — 2000 kVt·soatgacha, isitish mavsumidan tashqari — 1000 kVt·soatgacha, elektr energiyasi iste’moli uchun amaldagi tariflarga nisbatan 50 foizgacha chegirma qo‘llash nazarda tutilmoqda. Takliflar idoralararo tartibda kelishilgan.

Hozirda mavjud elektr tarmoqlarining qo‘shimcha yuklamani qabul qilish imkoniyati bo‘yicha texnik audit davom etmoqda. Shuningdek, Energetika vazirligi, IMV, O‘zenergoinspeksiya, HET AJ va HGT AJ tomonidan qo‘shimcha o‘rganishlar olib borilmoqda.

Energetika vaziri Jo'rabek Mirzamahmudov takliflarni ishlab chiqish va amalga oshirish strategik jihatdan muhim jarayon ekanligini ta'kidladi, bu puxta tahlil qilish va bosqichma-bosqich amalga oshirishni talab qiladi. Tugallangan hisob-kitoblar va texnik audit asosida umumiy xulosa chiqariladi, shundan so'ng chora-tadbirlarni amaliy amalga oshirish boshlanadi.

Vazirlik jamoatchilikni mamlakat energetika tizimini o'zgartirish jarayonining murakkabligi va mas'uliyatini hisobga olgan holda, islohotlarning borishini xolisona baholashga, rasmiy ma'lumotlarga tayanishga va asossiz fikrlarni tarqatmaslikka chaqiradi.