Oʻzbekiston Jahon banki bilan kafolat vositalarini kengaytirishni muhokama qildi

Toshkent, O‘zbekiston (UzDaily.uz) — Joriy yilning 28-noyabr kuni Iqtisodiyot va moliya vaziri o‘rinbosari Ilhomjon Umrzakov Jahon banki, Xalqaro moliya korporatsiyasi hamda Ko‘p tomonlama investitsiyalarni kafolatlash agentligi vakillari bilan uchrashdi.

Ko‘p tomonlama investitsiyalarni kafolatlash agentligi (Multilateral Investment Guarantee Agency — MIGA) — Jahon banki guruhining a’zosi bo‘lib, rivojlanayotgan mamlakatlarga to‘g‘ridan-to‘g‘ri xorijiy investitsiyalarni jalb qilishni qo‘llab-quvvatlashni ta’minlaydi. Agentlik xususiy investorlar va kreditorlar uchun xavflarni sug‘urtalash va kreditni mustahkamlash vositalarini taqdim etadi, shu bilan yirik investitsiya loyihalarini amalga oshirish va mamlakatlarning iqtisodiy salohiyatini rivojlantirishga ko‘maklashadi.

Uchrashuvda Jahon bankining Markaziy Osiyo bo‘yicha mintaqaviy direktori Naji Benxassin, MIGA delegatsiyasi tarkibida Yevropa bo‘yicha mintaqaviy rahbar Olga Schkovskaya, Markaziy Osiyo bo‘yicha mintaqaviy rahbar Jaeyoung Jin, Xalqaro moliya korporatsiyasining O‘zbekiston bo‘yicha direktori Nil Makkeyn, Jahon bankining energetika bo‘yicha bosh mutaxassisi Ferhat Esen hamda boshqa vakillar ishtirok etdi.

Uchrashuv davomida tomonlar davlat korxonalarini transformatsiya qilishda MIGA’ning amaliy ko‘magi yuzasidan firk almashdi. 

Jahon banki guruhi tomonidan bu borada taklif etilayotgan xizmat turlari bo‘yicha taqdimot o‘tkazdi. 

Uchrashuv yakunida tomonlar iqtisodiyotning ustuvor tarmoqlarida kafolat vositalarini qo‘llash istiqbollarini kengaytirish borasida hamkorlik qilishga kelishib oldi.