Noyabr oyida O‘zbekistonning Jahon savdo tashkilotiga qo‘shilishi bo‘yicha Ishchi guruh yig‘ilishi bo‘lib o‘tadi

Toshkent, O‘zbekiston (UzDaily.uz) — O‘zbekistonning Jahon savdo tashkiloti (JST)ga qo‘shilishi masalalari bo‘yicha Ishchi guruhning o‘n birinchi yig‘ilishi 2025 yil 5–6 noyabr kunlari Jeneva shahrida bo‘lib o‘tadi. Bu haqda O‘zbekiston Respublikasi Prezidentining JST masalalari bo‘yicha maxsus vakili Azizbek Urunov maʼlum qildi.

«O‘zbekistonning JSTga qo‘shilishi bo‘yicha navbatdagi, 11-yig‘ilish 5–6 noyabr kunlari tashkilotning bosh qarorgohi — Jenevada ochiq formatda o‘tkaziladi», — deb yozdi Urunov o‘zining LinkedIn sahifasida.

Uning maʼlumoticha, bu 2023 yildan beri ketma-ket oltinchi uchrashuv bo‘ladi. Ilgari Ishchi guruh yig‘ilishlari 2002, 2003, 2005, 2020 va 2022 yillarda o‘tgan edi.

«Bu mamlakatning JSTga aʼzo bo‘lish jarayonidagi yana bir muhim qadamdir. O‘zbekistonning saʼy-harakatlarini qo‘llab-quvvatlayotgan tashkilot aʼzolariga minnatdorlik bildiramiz va qolgan masalalarni hal etishga tayyormiz», — deb taʼkidladi Urunov.

O‘zbekiston JSTga aʼzo bo‘lish jarayonini 2026 yilda Kamerunda bo‘lib o‘tadigan 14-vazirlar konferensiyasigacha yakunlashni rejalashtirmoqda.

Hozirgi vaqtda respublika bozorga kirish bo‘yicha 29 ta bitimni imzolagan va yana ikki davlat bilan dastlabki kelishuvlarga erishgan. Ikki tomonlama muzokaralarni to‘liq yakunlash uchun yana uchta davlat bilan shartlarni kelishish qolgan.