Nogironlikni belgilashning raqamlashtirilgan tizimi joriy qilinmoqda

Toshkent, O‘zbekiston (UzDaily.uz) — “Nogironlikni belgilash tizimi raqamlashtirilishi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida” 587-sonli Hukumat qarori qabul qilindi.

Qaror bilan tizimda qator o‘zgarishlar kiritilmoqda.

Avval bemorlar faqat tuman markaziy poliklinikalarining vrachlik-maslahat komissiyalariga og‘zaki murojaat qilgan bo‘lsa, endilikda nogironlikni belgilash masalasida “Inson” markazlari, ijtimoiy xodimlar, my.gov.uz portali va oilaviy shifokorlar orqali murojaat qilish imkoniyati yaratildi.

Tajriba-sinov davrida (2025 yil 1 apreldan bugungi kunga qadar) Toshkent shahri va Navoiy viloyatidan 12,5 ming ariza tushgan. Shundan:

“Inson” markazi orqali – 6,5 ming (52,4%),

oilaviy shifokor orqali – 5,9 ming (47,5%),

elektron portal orqali – 17 ta (0,1%).

Nogironlikni belgilashdan avval barcha uchun bir xil davolanish lozim muddatlar (4 oydan 6 oygacha) bo‘yicha talab bekor qilinib, kasallikdan kelib chiqib, individual davolanish muddatlari va minimal tibbiy tekshiruv mezonlari belgilandi.

Qolaversa, sirtdan (ko‘rikka chaqirtirmasdan) nogironlik belgilanadigan kasalliklar va uning asoratlari ro‘yxati 48 tadan 60 taga kengaytirildi.