Navoiy viloyatida 104 mlrd so‘mlik noqonuniy kriptovalyuta operatsiyalari bilan shug‘ullangan guruh fosh etildi

Toshkent, O‘zbekiston (UzDaily.uz) — Navoiy viloyatida huquqni muhofaza qiluvchi organlar noqonuniy kriptovalyuta operatsiyalari bilan shug‘ullangan uyushgan guruh faoliyatini to‘xtatdi. Ichki ishlar vazirligi huzuridagi Kiberxavfsizlik markazi maʼlumotlariga ko‘ra, ular tomonidan tuzilgan onlayn-obmen platformalari orqali amalga oshirilgan tranzaksiyalar umumiy qiymati 104 milliard so‘mdan oshgan.

Vazirlik maʼlumoticha, 34, 31, 26 va 25 yoshdagi to‘rt nafar erkak qo‘lga olindi. Guruh ijtimoiy tarmoqlarda “1payment” va «P2P Trade» nomi ostida ishlab, kriptovalyutani almashish xizmatlarini taklif qilib kelgan. Noqonuniy hisob-kitoblarni amalga oshirish uchun ular ko‘p hollarda soxta shaxslar nomiga rasmiylashtirilgan bank kartalaridan foydalanishgan.

Olib borilgan tintuvlar natijasida 68 ta bank kartasi, 12 ta mobil telefon, turli mobil operatorlarga tegishli 8 ta SIM-karta va 2 ta shaxsiy kompyuter musodara qilindi.

Hozirda mazkur holat yuzasidan dastlabki tekshiruv ishlari olib borilmoqda. Ushbu guruhning boshqa jinoyatlarga aloqadorligi ham o‘rganilmoqda.